11.03.2026 | 15:19
ԲԸՏՄ-ն առգրավել է որսորդական հրացաններ և ապօրինի որսված 159 արտույտ
Կրեմլը բացասաբար է վերաբերվում Ուկրաինայում եվրոպական զորքերի տեղակայման հնարավորությանը
Քաղաքականություն
27.08.2025 | 20:19
Ռուսաստանը բացասաբար է վերաբերվում Ուկրաինայում եվրոպական զորքերի տեղակայման հնարավորությանը։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է Ինտերֆաքսը։
«Բացասաբար ենք վերաբերվում»,- լրագրողների հետ զրույցում նա այսպես է պատասխանել հարցին, թե ինչպես է Կրեմլը դիտարկում Ուկրաինայի համար հնարավոր անվտանգության երաշխիքները, որոնք կարող են ներառել այդ երկրում եվրոպական զորքերի տեղակայումը։
Պեսկովը նշել է, որ «գոյություն չունեն եվրոպական զինվորականներ, կան կոնկրետ երկրների զինվորականներ, և այդ երկրների մեծ մասը ՆԱՏՕ-ի անդամներ են»։ Նրա խոսքով՝ հենց ՆԱՏՕ-ի ռազմական ենթակառուցվածքների տեղակայումն Ուկրաինայում հակամարտության սկզբնական պատճառներից մեկը դարձավ։
Կրեմլի խոսնակը նաև հայտարարել է, որ կարգավորման բանակցություններում անընդհատ քննարկվում են Ուկրաինայի համար հնարավոր անվտանգության երաշխիքները, սակայն իշխանությունները չեն ցանկանում մանրամասները բացահայտել։
«Սակայն մենք չէինք ցանկանա այս թեման հիմա քննարկել հրապարակային ձևաչափով։ Մենք կարծում ենք, որ սա օգտակար չէ ընդհանուր արդյունավետության համար»,- ընդգծել է նա։
Financial Times-ն էլ այսօր հաղորդել է, որ ԱՄՆ-ը պատրաստ է Ուկրաինայի համար արևմտյան անվտանգության երաշխիքների շրջանակում տրամադրել հետախուզական և օդային պաշտպանության աջակցություն։ Այսպես կոչված, «կամավորների կոալիցիան», որը գլխավորում են Մեծ Բրիտանիան և Ֆրանսիան, քննարկում է եվրոպական զորքեր ուղարկելու հնարավորությունը, սակայն տեղական պաշտոնյաները խոստովանում են, որ դա հնարավոր կլինի միայն ԱՄՆ-ի աջակցությամբ։
ԱՄՆ նախագահ Դոնալդ Թրամփն ավելի վաղ ընդգծել էր, որ Ուկրաինայի տարածքում ամերիկյան զորքեր չեն լինի։ Նա նաև ասել է, որ իր կարծիքով՝ Ռուսաստանի համար խնդիր չի լինի Ուկրաինայում զորքերի տեղակայումն այնպիսի երկրներից, ինչպիսիք են Ֆրանսիան, Գերմանիան և Մեծ Բրիտանիան։
Թարգմանությունը՝ Էմմա Չոբանյանի
