«Ալիև, մի՛ զայրացրու Ռուսաստանին»․ Պետերբուրգում Ադրբեջանի հյուպատոսության մոտ բողոքի ակցիա է անցկացվել․ ՏԵՍԱՆՅՈՒԹ

Սանկտ Պետերբուգում Ադրբեջանի հյուպատոսության մոտ բողոքի ակցիա է անցկացվել։ Այն կազմակերպել են ազգային բոլշևիկյան«Է. Վ. Լիմոնովի մյուս Ռուսաստան» կուսակցության ակտիվիստները։ Իրավապահները ակցիայի երեք մասնակցի են ձերբակալել՝ Գլեբ Եժովին, Դանիլ Շմալկոյին և Իվան Գուբինին:

Մինչ իրավապահների միջամտությունը՝ ակցիայի մասնակիցները հասցրել են կարդալ մանիֆեստը։

«Ալիև, մի՛ զայրացրու Ռուսաստանին։ Ադրբեջանի նախագահ Ալիևը որոշեց ռուսատյացություն խաղալ։ Նա սիրով ընկերանում է Կիևի հանցավոր ռեժիմի հետ, օգնում է նրան ռազմական և քաղաքացիական մատակարարումներով, հավանություն է տալիս Ռուսաստանի հետ պատերազմին։ Մյուս օրը նա շնորհավորել է արյունոտ ծաղրածու Զելենսկիին Անկախության օրվա կապակցությամբ։ Ալիևը փակել է Բաքվի Ռուսական տունը, բանտարկում է ռուս լրագրողներին և լռեցնում նրանց, ովքեր ցանկանում են բարեկամանալ մեր երկրի հետ։ Միաժամանակ, Բաքուն հսկայական գումարներ է ստանում սփյուռքից, այստեղ ապրում և գումար են վաստակում հարյուր հազարավոր ադրբեջանցիներ, միլիարդատերերի ցանկը լի է նրանցով։ Ալիևը կարծում է, որ հնարավոր է սնվել Ռուսաստանից և միաժամանակ վատ բաներ անել նրա դեմ։ Դա չի աշխատի»,- ընթերցել են ակցիայի մասնակիցները։

Նրանք Ադրբեջանի իշխանություններից պահանջել են՝ դադարեցնել աջակցել Կիևին, ազատ արձակել լրագրողներ Իգոր Կարտավիխին, Եվգենի Բելոուսովին, քաղաքագետ Նազաքեթ Մամեդովային, Եվրասիական շարժման ակտիվիստներ Իբրահիմ Հասանովին, Իբրահիմ Գումբատովին և ուրիշներին, ինչպես նաև բացել Ռուսական տունը և չխանգարել Ռուսաստանի մշակութային ու կրթական գործունեությանը։

Թարգմանությունը՝ Էմմա Չոբանյանի