16.07.2026 | 15:55
Վանաձորի նախկին համայնապետ Մամիկոն Ասլանյանի վերաբերյալ նոր գործ է ուղարկվել Հակակոռուպցիոն դատարան
Դանիան կանչել է ԱՄՆ դեսպանին՝ Գրենլանդիայում գաղտնի ազդեցության գործողությունների մասին լուրերի ֆոնին
Քաղաքականություն
27.08.2025 | 21:21
Դանիան չորեքշաբթի ԱԳՆ է կանչել երկրում ԱՄՆ գործերի ժամանակավոր հավատարմատարին՝ Գրենլանդիայում՝ դանիական ինքնավար տարածքում, որը ԱՄՆ նախագահ Դոնալդ Թրամփը ցանկանում է վերահսկել, միջամտելու փորձերի մասին հաղորդագրություններից հետո, գրում է France 24-ը։
Լրատվամիջոցը հիշեցնում է, որ հունվարին Սպիտակ տուն վերադառնալուց ի վեր Թրամփը բազմիցս հայտարարել է, որ Ամերիկային անհրաժեշտ է ռեսուրսներով հարուստ կղզին՝ անվտանգության նկատառումներից ելնելով, և հրաժարվել է բացառել ուժի կիրառումը՝ դա ապահովելու համար։
Հունվարին անցկացված սոցհարցումների համաձայն՝ Գրենլանդիայի 57,000 բնակիչների մեծամասնությունը ցանկանում է անկախանալ Դանիայից, բայց չի ցանկանում միանալ Միացյալ Նահանգներին։
Դանիական հանրային հեռարձակող DR-ի հաղորդմամբ՝ անանուն կառավարական և անվտանգության աղբյուրները, ինչպես նաև Գրենլանդիայում և Միացյալ Նահանգներում անանուն աղբյուրները կարծում են, որ Թրամփի հետ կապեր ունեցող առնվազն երեք ամերիկացիներ գաղտնի ազդեցության գործողություններ են իրականացրել տարածքում։ Նշվում է, որ ութ աղբյուրներից ստացված տեղեկատվության համաձայն՝ նպատակը Գրենլանդիայի հասարակության ներսում Դանիայի հետ հարաբերությունները թուլացնելն է։
Նշվում է նաև, որ Թրամփին մոտ կանգնած երեք ամերիկացի պաշտոնյաները վերջերս նկատվել են Գրենլանդիայի և Դանիայի միջև լարվածություն առաջացրած անցյալի հարցերի վերաբերյալ տեղեկություններ հավաքագրելիս, այդ թվում՝ գրենլանդացի երեխաների՝ իրենց ընտանիքներից հարկադիր հեռացման և հարկադիր հակաբեղմնավորման սկանդալի վերաբերյալ։
DR-ը նշում է, որ չի կարողացել պարզաբանել՝ ամերիկացիները գործել են սեփակա՞ն նախաձեռնությամբ, թե՞ հրահանգով։
«Մենք տեղյակ ենք, որ օտարերկրյա դերակատարները շարունակում են հետաքրքրություն ցուցաբերել Գրենլանդիայի և Դանիայի Թագավորությունում դիրքորոշման նկատմամբ։ Հետևաբար, զարմանալի չէ, եթե մենք առաջիկայում ականատես լինենք Թագավորության ապագայի վրա ազդելու արտաքին փորձերի։ Թագավորության ներքին գործերին միջամտելու ցանկացած փորձ, իհարկե, անընդունելի կլինի»,- հայտարարել է երկրի արտգործնախարար Լարս Լոկե Ռասմուսենը։
Նա նշել է, որ «խնդրել է ԱԳՆ-ին հանդիպման կանչել ԱՄՆ գործերի ժամանակավոր հավատարմատարին»։
Թարգմանությունը՝ Էմմա Չոբանյանի
