24.06.2026 | 07:58
ԱԱ-2026. Կոլումբիան հաղթեց ու նվաճեց փլեյ-օֆֆի ուղեգիր. ՏԵՍԱՆՅՈՒԹ
Թրամփը ՌԴ-ին սպառնացել է «տնտեսական պատերազմով»
Քաղաքականություն
27.08.2025 | 13:14
ԱՄՆ նախագահ Դոնալդ Թրամփը նախարարների կաբինետի անդամների հետ հանդիպման ժամանակ Ռուսաստանին սպառնացել է «տնտեսական պատերազմով», եթե իրեն չհաջողվի հասնել Ռուսաստանի կողմից Ուկրաինայի դեմ լայնածավալ պատերազմի դադարեցմանը։ Այս մասին գրում է Bloomberg-ը, որին վկայակոչում է Current time-ը։
«Դա չի լինի համաշխարհային պատերազմ, դա տնտեսական պատերազմ կլինի։ Դա վատ կլինի Ռուսաստանի համար, և ես դա չեմ ուզում»,- ասել է Թրամփը՝ պատասխանելով հարցին՝ արդյո՞ք ՌԴ նախագահ Վլադիմիր Պուտինը ժամանակացույց ունի Ուկրաինայի նախագահ Վլադիմիր Զելենսկիի հետ երկկողմ բանակցություններին համաձայնվելու համար։
ԱՄՆ նախագահը նշել է, որ իր «մտադրությունները շատ լուրջ են»։
Թրամփը Պուտինի հետ հանդիպել է օգոստոսի 15-ին Ալյասկայում։ Դրանից հետո ԱՄՆ նախագահը հայտարարել էր Զելենսկիի և Պուտինի երկկողմ հանդիպման մասին, սակայն մեկուկես շաբաթ անց հանդիպումը չի նշանակվել։ Հաղորդվել էր, որ այն կկայանա Անքորիջի բանակցություններից հետո երկու շաբաթվա ընթացքում։
ԱՄՆ նախագահը նշել է, որ կձգտի Ռուսաստանի և Ուկրաինայի առաջնորդների անձնական հանդիպման, քանի որ «ցանկանում է, որ ամեն ինչ ավարտվի»։
Լրագրողի դիտարկմանը, թե Ռուսաստանի արտգործնախարար Սերգեյ Լավրովն ասել է, որ Պուտինը չի ստորագրի խաղաղության համաձայնագիր Զելենսկիի հետ, քանի որ նրան համարում է ոչ լեգիտիմ, Թրամփը պատասխանել է. «Կարևոր չէ՝ ինչ են ասում։ Այդ ամենն անհեթեթություն է։ Նրանք բոլորը պարզապես խաղում են հանրության առաջ»։
Միաժամանակ, Դոնալդ Թրամփը հավելել է, որ Զելենսկին «նույնպես ամբողջովին անմեղ չէ» այն հարցում, որ խաղաղության գործընթացում առաջընթաց չկա։
«Ես հիմա լավ հարաբերություններ ունեմ նրա հետ, բայց մենք բոլորովին այլ հարաբերություններ ունենք, քանի որ հիմա մենք Ուկրաինային ոչ մի գումար չենք վճարում»,- ասել է Թրամփը՝ անդրադառնալով գործարքին, որի համաձայն՝ ՆԱՏՕ-ի անդամները Կիևի համար ամերիկյան զենք են գնում։
ԱՄՆ նախագահի հատուկ բանագնաց Սթիվ Ուիթկոֆն էլ կառավարության նիստում հայտարարել է, որ Վաշինգտոնը հույս ունի Ուկրաինայում պատերազմն ավարտել մինչև 2025 թվականի վերջը։ Ըստ նրա՝ այս շաբաթ ամերիկյան կողմը հանդիպումներ կկազմակերպի ինչպես ուկրաինական, այնպես էլ այլ հակամարտությունների կարգավորման հարցի շուրջ, այդ թվում՝ հիշատակելով Գազայի պատերազմը և Իսրայելի ու Իրանի միջև հակամարտությունը։
Թարգմանությունը՝ Էմմա Չոբանյանի
