Իլոն Մասկը դատի է տվել Apple-ին և OpenAI-ին

Ամերիկացի գործարար, միլիարդատեր Իլոն Մասկի X-ը և xAI-ը Տեխասում դատական ​​​​հայց են ներկայացրել OpenAI-ի (ChatGPT չաթբոտի արտադրող) և Apple-ի դեմ։ Այս մասին հայտնել է Bloomberg-ը, որին վկայակոչում է Meduza-ն։

Մասկի փաստաբանները դատական ​​հայցում նշել են, որ Apple-ի և OpenAI-ի միջև կնքված բացառիկ համաձայնագիրը ChatGPT-ն դարձրել է iPhone-ներում ինտեգրված միակ չաթբոտը։ Հայցում նշվում է, որ որոշումը զսպում է արհեստական ​​բանականության ոլորտում մրցակցությունն ու նորարարությունը և վնասում սպառողներին՝ զրկելով նրանց ընտրության հնարավորությունից։ Մասկի ընկերությունները միլիարդավոր դոլարների փոխհատուցում են պահանջում։

OpenAI-ի ներկայացուցիչը Bloomberg-ին ասել է, որ դատական ​​​​հայցը «համապատասխանում է Մասկի կողմից շարունակական հետապնդումների պրակտիկային»: Apple-ը չի մեկնաբանել հայցը։

Apple-ը 2024 թվականին համաձայնագիր է կնքել OpenAI-ի հետ, որի համաձայն՝ ChatGPT-ն կավելացվի Apple Intelligence-ին՝ iOS 18-ում ներկառուցված անհատականացված արհեստական ​​բանականության համակարգին։

Apple-ի ավագ փոխնախագահ Էդի Քյուն 2025 թվականի մայիսին հայտարարել էր, որ համաձայնագիրը բացառիկ չէ։ Նա նշել էր, որ Apple-ը կարող է ինտեգրել արհեստական ​​բանականության այլ հավելվածներ կամ գործառույթներ, եթե ցանկանա։

Իլոն Մասկը վաղուց ի վեր թշնամանքի մեջ է OpenAI-ի գործադիր տնօրեն Սեմ Ալթմանի հետ։ Երկու գործարարներն էլ մասնակցել են OpenAI-ի ստեղծմանը 2015 թվականին, սակայն առաջացած անհամաձայնությունների պատճառով Մասկը լքել է OpenAI-ի տնօրենների խորհուրդը 2018 թվականին։ Այդ ժամանակ Մասկը հղում էր արել շահերի հնարավոր բախմանը։

Օգոստոսի 11-ին Իլոն Մասկը X սոցիալական ցանցում հայտարարել էր, որ Apple-ը խախտում է հակամենաշնորհային օրենքները, քանի որ, OpenAI-ից բացի, արհեստական ​​բանականության ոչ մի ընկերություն չի կարող հասնել App Store-ի #1 տեղին։

Ալթմանը պատասխանել էր, որ լսել է՝ Մասկը «մանիպուլյացիաներ է անում X-ի հետ իր և իր ընկերությունների օգտին՝ միաժամանակ վնասելով իր մրցակիցներին և իրեն դուր չեկող մարդկանց»։

Իլոն Մասկի xAI-ն էլ մշակում է իր սեփական չաթբոտը՝ Grok-ը։

Թարգմանությունը՝ Էմմա Չոբանյանի