07.09.2026 | 22:24
Հայաստանի մի շարք հասցեներում էլեկտրաէներգիայի անջատումներ կլինեն
Ժնևում վաղը տեղի կունենան Իրանի ու եվրոպական երկրների բանակցությունները միջուկային գործարքի շուրջ
Քաղաքականություն
25.08.2025 | 13:38
Իրանն ու եվրոպական երեք տերությունները՝ Գերմանիան, Ֆրանսիան և Մեծ Բրիտանիան, երեքշաբթի Ժնևում կվերսկսեն միջուկային բանակցությունները՝ կենտրոնանալով միջուկային հարցերի և պատժամիջոցների մեղմացման վրա, փոխանցում է Mehr գործակալությունը:
Տեղեկացված աղբյուրը Tasnim-ին հայտնել է, որ Իրանն ու եվրոպական երեք երկրները (Գերմանիա, Ֆրանսիա և Մեծ Բրիտանիա) համաձայնության են եկել Ժնևում միջուկային բանակցություններ անցկացնելու վերաբերյալ։
Ըստ աղբյուրի՝ Ժնևում Իրանի պատվիրակությունը կգլխավորի ԱԳ փոխնախարար Մաջիդ Թախտ-Ռավանչին, Գերմանիան, Ֆրանսիան և Մեծ Բրիտանիան նույնպես կներկայացնեն փոխարտգործնախարարները։
Հավելենք, որ ուրբաթ եվրոպական երեք երկրների արտաքին գործերի նախարարներն ու ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը համատեղ հեռախոսազրույց էին ունեցել Իրանի արտաքին գործերի նախարար Աբբաս Արաղչիի հետ։
Ըստ իրանական կողմի՝ այս հեռախոսազրույցի ընթացքում բացատրվել է Իրանի դիրքորոշումը, այսպես կոչված, Snapback մեխանիզմի վերաբերյալ ու եվրոպական երեք երկրների և Եվրամիության պատասխանատվությունն այս հարցում, իսկ Իրանի արտաքին գործերի նախարարը, ընդգծելով այդ երկրների իրավական և բարոյական անկարողությունը վերոնշյալ մեխանիզմին դիմելու հարցում, զգուշացրել էր նման գործողությունների հետևանքների մասին։
Հեռախոսազրույցի ընթացքում եվրոպական երկրներն ու ԵՄ բարձր ներկայացուցիչն ընդգծել են եվրոպական երկրների պատրաստակամությունը դիվանագիտական լուծում գտնելու հարցում։ Արդյունքում որոշվել է, որ Իրանի բանակցությունները եվրոպական եռյակի ու Եվրամիության հետ կշարունակվեն երեքշաբթի՝ փոխարտգործնախարարների մակարդակով։
Թարգմանությունը՝ Էմմա Չոբանյանի
