Հունգարիայի ԱԳՆ-ն Զելենսկիին կոչ է արել դադարեցնել «Դրուժբա» նավթամուղի հետ կապված «սպառնալիքները»․ Կիևն արձագանքել է

Ուկրաինայի արտաքին գործերի նախարար Անդրեյ Սիբիhան իր հունգարացի գործընկեր Պետեր Սիյարտոյին հորդորել է «չհրամայել Ուկրաինայի առաջնորդ Վլադիմիր Զելենսկիին, թե ինչ անի կամ ասի», փոխանցում է DW-ի ռուսական ծառայությունը։

«Անհրաժեշտ չէ [հրամայել] Ուկրաինայի նախագահին ասել, թե երբ ինչ ասի կամ անի։ Նա Ուկրաինայի նախագահն է, այլ ոչ թե Հունգարիայի»,- գրել է Սիբիհան X սոցիալական ցանցում։

Վեճի պատճառը Սիյարտոյի արձագանքն է Զելենսկիի հայտարարությանը Ուկրաինայի անկախության 34-ամյակին նվիրված մամուլի ասուլիսի ժամանակ։ Զելենսկին ակնարկել էր, որ «Դրուժբա» նավթամուղին հարվածներն ուղղակիորեն կապված են Հունգարիայի դիրքորոշման հետ՝ ԵՄ-ին Ուկրաինայի անդամակցության հարցում։

«Մենք միշտ աջակցել ենք Ուկրաինայի և Հունգարիայի միջև բարեկամությանը։ Եվ հիմա «Դրուժբա»-ի գոյությունը կախված է Հունգարիայի դիրքորոշումից»,- ասել է Զելենսկին։

Հունգարիայի ԱԳ նախարարն Ուկրաինայի ղեկավարի այս խոսքերը ընկալել է որպես սպառնալիք։

«Զելենսկին օգտագործել է Ուկրաինայի ազգային տոնը՝ Հունգարիային սպառնալու համար։ Մենք կտրականապես մերժում ենք Ուկրաինայի նախագահի սպառնալիքները»,- գրել է Սիյարտոն X-ում, միաժամանակ, Զելենսկիին կոչ անելով «վերջ դնել անխոհեմ հարձակումներին» Հունգարիայի էներգետիկ անվտանգության վրա։

Մեկնաբանելով Սիյարտոյի՝ էներգետիկ անվտանգության մասին խոսքերը՝ Անդրեյ Սիբիհան իր հերթին կոչ է արել Հունգարիային դիվերսիֆիկացնել իր նավթի մատակարարումները և «անկախանալ Ռուսաստանից, ինչպես մնացյալ Եվրոպան»։

Հավելենք, որ օգոստոսի լույս 18-ի գիշերն Ուկրաինայի զինված ուժերը հարված էին հասցրել ՌԴ Տամբովի մարզում գտնվող Նիկոլսկայա նավթամուղային կայանի վրա, որի հետևանքով «Դրուժբա»-ի գլխավոր նավթամուղով նավթի մատակարարումն ամբողջությամբ դադարեցվել էր։

Հունգարիան և Սլովակիան օգոստոսի 19-ի երեկոյան հայտնել են խողովակաշարով ռուսական նավթի մատակարարումների վերսկսման մասին։

Ավելի վաղ՝ օգոստոսի 13-ին, ուկրաինական անօդաչու թռչող սարքերը հարձակվել են «Դրուժբա»-ի  ամենամեծ հանգույցի՝ Բրյանսկի մարզում գտնվող «Ունեչա» կայանի վրա։

ՌԴ-ից Հունգարիա նավթի մատակարարումները դարձյալ ժամանակավորապես դադարեցվել էին։ Օգոստոսի 21-ին ուկրաինական անօդաչու թռչող սարքերը կրկին հարձակվել էին «Ունեչա» կայանի վրա. ներկայում նավթը խողովակաշարով չի մատակարարվում Հունգարիա և Սլովակիա։

Թարգմանությունը՝ Էմմա Չոբանյանի