01.04.2026 | 19:48
Փաշինյանը՝ Պուտինին․ «ՌԴ անձնագրով քաղաքացիները չեն կարող լինել վարչապետի թեկնածու». ՏԵՍԱՆՅՈՒԹ
Ուկրաինան ռուս-վրացական սահմանից վերադարձրել է իր 65 քաղաքացիների
Քաղաքականություն
22.08.2025 | 16:31
Ուկրաինայի իշխանությունները կազմակերպել են Ռուսաստանի և Վրաստանի սահմանի բուֆերային գոտուց 65 քաղաքացիների վերադարձը, հայտնել են Ուկրաինայի արտաքին գործերի նախարար Անդրեյ Սիբիհան և երկրի ներքին գործերի նախարար Իգոր Կլիմենկոն։
DW-ի ռուսական ծառայության փոխանցմամբ՝ Ուկրաինա վերադարձածների թվում կան 10 կին և 8 ծանր հիվանդ։ Նրանք հայրենիք են տեղափոխվել Մոլդովայի տարածքով տարանցիկ ճանապարհով։
«Բոլորը գտնվել են վրացական «Դարիալի» անցակետում՝ փաստացի Ռուսաստանի գործողությունների հետևանքով ստեղծված մարդասիրական ճգնաժամի պայմաններում։ Ուկրաինացի դիվանագետներն ու հյուպատոսները բոլոր ջանքերը գործադրել են քաղաքացիներին վերադարձնելու և սահմանին նրանց գտնվելու պայմանները բարելավելու համար, մասնավորապես, միջազգային կազմակերպությունների ներգրավմամբ»,- նշել են Սիբիհան և Կլիմենկոն։
Ուկրաինայի ԱԳՆ-ի տվյալներով՝ վերջին ամիսներին երկիր է վերադարձվել ևս 44 քաղաքացի։ Այսպիսով, նախորդ ամիսներին «Դարիալի» անցակետից վերադարձված ուկրաինացիների ընդհանուր թիվը կազմել է 109 մարդ։
Ուկրաինացի պաշտոնյաները շեշտել են, որ «ռուս-վրացական սահմանին մարդասիրական ճգնաժամը ծագել է հունիսի երկրորդ կեսին, երբ Ռուսաստանը միտումնավոր սկսել է ավելացնել այս անցակետ արտաքսված ուկրաինացի քաղաքացիների թիվը»։
«Ուկրաինական կողմը հրապարակավ դիմել է Ռուսաստանի Դաշնությանը՝ նրանց ուղղակիորեն Ուկրաինայի, այլ ոչ թե Վրաստանի սահման ուղարկելու համար։ Այս առաջարկը մնում է ուժի մեջ։ Եթե Ռուսաստանը շարունակի անտեսել այն, միակ եզրակացությունը կլինի, որ արտաքսվածների թվի կտրուկ աճը Ռուսաստանի կողմից Ուկրաինայի դեմ ծրագրված գործողություն է»,- ընդգծել են նրանք։
