Իտալիայում Ուկրաինայի քաղաքացի է ձերբակալվել՝ «Հյուսիսային հոսք»-երի պայթյունին մասնակցության կասկածանքով

Իտալիայում ձերբակալվել է Ուկրաինայի քաղաքացի Սերգեյ Կ.-ն՝ «Հյուսիսային հոսք»-երի պայթյունին մասնակցության կասկածանքով: Այս մասին հայտնել է Գերմանիայի դաշնային դատախազությունը, փոխանցում է Current time-ը։

Իտալական Ռիմինիում նրան ձերբակալել են 2025 թվականի օգոստոսի 18-ին Գերմանիայում դատավորի կողմից տրված ձերբակալության եվրոպական օրդերի հիման վրա:

Ուկրաինայի քաղաքացին մեղադրվում է Քրեական օրենսգրքի երեք հոդվածներով՝ պայթյուններ կատարելը, դիվերսիա իրականացնելը և կառույցներ ոչնչացնելը։ Հետաքննության տվյալներով՝ Սերգեյ Կ.-ն այն խմբում է եղել, որի անդամները 2022 թվականի սեպտեմբերին պայթուցիկ սարքեր են տեղադրել «Հյուսիսային հոսք 1» և «Հյուսիսային հոսք 2» գազատարների վրա: Գերմանիայի դատախազությունը ենթադրում է, որ ձերբակալվածը գործողության համակարգողներից մեկն է եղել:

Իտալիայից արտահանձնվելուց հետո նրա նկատմամբ պետք է խափանման միջոց ընտրվի:

Պայթյունների հետևանքով «Հյուսիսային հոսք»-երի չորս ճյուղերից երեքն անդառնալիորեն վնասվել են: Խողովակաշարի պայթյունի գործում ներգրավված են մեկ կին և հինգ տղամարդ: Նրանց թվում, ենթադրաբար, կան երեք ուկրաինացի ջրասուզորդ-հրահանգիչներ, այդ թվում՝ Վլադիմիր Ժուրավլյովը:

Ըստ քննիչների՝ 2022 թվականի սեպտեմբերին նրանք Andromeda զբոսանավով դուրս են եկել Ռոստոկի Հոհե Դյունե նավահանգստից, այնուհետև կանգ են առել Ռյուգեն, Բորնհոլմ, Քրիստիանսյո, Սանդհամն և Կոլոբժեգ կղզիներում, որից հետո վերադարձել են Ռոստոկ։ Նավարկության ընթացքում ջրասուզակները, ենթադրաբար, պայթուցիկներ են ամրացրել խողովակաշարերին։

The Wall Street Journal-ը պնդում է, որ Ուկրաինայի նախագահ Վլադիմիր Զելենսկին հավանություն է տվել գազատարները պայթեցնելու գործողությանը, իսկ հետո ապարդյուն փորձել է չեղարկել այն, երբ ամերիկյան ԿՀՎ-ն իմացել է այդ մասին։ Պարբերականի տվյալներով՝ Զելենսկին հրահանգել է Ուկրաինայի զինված ուժերի այն ժամանակվա գլխավոր հրամանատար Վալերի Զալուժնիին չեղարկել գործողությունը, սակայն, ենթադրաբար, գեներալը չի ​​կատարել հրամանը և շարունակել է նախապատրաստական ​​աշխատանքները։ Լրագրողների հետ զրույցում Զալուժնին ասել է, որ ոչինչ չգիտի գործողության մասին։ Կիևը հերքում է իր մասնակցությունը դիվերսիային։