05.12.2025 | 23:32
ԱԱ․ Բաչկովը հաղթել է ժամկետից շուտ, Մաշակարյանը և Հովհաննիսյանը ևս շարժվում են առաջ
Նվեր թանկարժեք ժամացույց և անտոկոս 80 մլն դրամ պարտք․ ինչ է հայտարարագրել Արթուր Վանեցյանը․ ՏԵՍԱՆՅՈՒԹ
Քաղաքականություն
21.08.2025 | 19:00
ԱԱԾ նախկին տնօրեն, ԱԺ «Պատիվ ունեմ» խմբակցության նախկին ղեկավար Արթուր Վանեցյանը Կոռուպցիայի կանխարգելման հանձնաժողովին 2024 թվականի գույքի և եկամուտների հայտարարագիր է ներկայացրել որպես «Հայրենիք» կուսակցության նախագահ։
Ըստ այդմ՝ Վանեցյանի անշարժ գույքը չի փոփոխվել․ նա ունի բնակարան Երևանում, որը գնել է 2014 թվականին, տարիներ շարունակ նաև տիրապետում է Երևանում գտնվող առանձնատան։
Արթուր Վանեցյանն անցած տարի թանկարժեք՝ 16 հազար դոլար արժողությամբ ձեռքի ժամացույց է նվիրատվություն ստացել Արամ Նիկողոսյանից։
Տարեվերջի դրությամբ՝ նրա բանկային հաշվին եղել է 9877 դոլար, կանխիկ հայտարարագրել է 12 հազար դոլար և 8,4 մլն դրամ։
Վանեցյանը 2024-ին 89,5 մլն դրամ եկամուտ է ունեցել, որի մեծ մասը՝ 40 մլն դրամ և 106 հազար 130 դոլար (միասին՝ 80,8 մլն դրամ), անտոկոս փոխառություն (պարտք) է տվել նրա հորեղբորորդին՝ Տիգրան Վանեցյանը, իսկ 5,541 դոլարը և 2 մլն դրամը վարկ է «Ամերիաբանկ»-ից։ ԱԱԾ-ից Վանեցյանի կենսաթոշակը 3,3 մլն դրամ է։
Տիգրան Վանեցյանը ԱԱԾ նախկին ղեկավարի հոր՝ Գագիկ Վանեցյանի բիզնես գործընկերն է, ղեկավարում է Գագիկ Վանեցյանին պատկանող «Էյ Բի Էքսպորտ» ՍՊԸ-ն։ Գագիկ Վանեցյանը բազմաթիվ ընկերությունների հիմնադիր և համահիմնադիր է․ նրան են պատկանում «Ավ Գրուպ» (100%), «Էյ Բի Տրանս» (37.5%), «Արքարարտ» (100%), «Սթոն Քրաֆթ» (100%), «Վան Օյլ Թրեյդ» (100%), «Ուռբան Գրուպ» (50%), «Պռոբետոն» (100%) ընկերությունները։ Նրան է պատկանում նաև Երևանի Դեմիրճյան 62 հասցեում գտնվող առանձնատունը, որտեղ գործում է հարսին՝ Նոնա Վանեցյանին պականող «Վիլլա Մոնտեսսորի» կենտրոնը («Յանգ ուսումնական կենտրոն» ՍՊԸ)։
Ուշագրավ է, որ վերջինը տարածքի վարձակալության համար Գագիկ Վանեցյանին 2022 թվականին վճարել է 48,6 մլն դրամ։ Այս մասին նշված է Գագիկ Վանեցյանի հայտարարագրում, որը նա ներկայացրել է կնոջ՝ Մարգարիտ Ազարյանի պաշտոնաթողության կապակցությամբ։
Հիշեցնենք, որ Արթուր Վանեցյանի մայրը 2011-2017 թվականներին եղել է ՀՀ նախագահի աշխատակազմի կադրերի վարչության պետ, 2018-ին՝ ՀՀ վարչապետի աշխատակազմի կադրերի և անձնակազմի կառավարման վարչության պետ, իսկ 2019-2022-ին՝ ՀՀ նախագահի օգնական։
Գայանե Խաչատրյան
