27.06.2026 | 19:38
Ռաիսա Մկրտչյանը նշանակալի ներդրում է ունեցել նոր սերնդի կրթության և դաստիարակության գործում․ Փաշինյան
Թրամփի առաջարկած քարտեզն ու Պուտին-Զելենսկի հանդիպումը․ արդյոք կավարտվի 3,5 տարի ձգվող պատերազմը. ՏԵՍԱՆՅՈՒԹ
Քաղաքականություն
20.08.2025 | 20:45
Ռուսաստանի և Ուկրաինայի նախագահները երկկողմ հանդիպում կազմակերպելու գործընթացում են՝ պատերազմի ավարտը քննարկելու համար։ Այս մասին հայտնել է ԱՄՆ նախագահ Դոնալդ Թրամփը՝ Պուտինի և Զելենսկիի հետ հանդիպումներից հետո։
«Ես շատ հաջող հանդիպում ունեցա նախագահ Պուտինի հետ: Շատ հաջող հանդիպում ունեցա նախագահ Զելենսկիի հետ, և հիմա կարծում եմ, որ ավելի լավ կլինի, եթե նրանք հանդիպեն առանց ինձ, որպեսզի տեսնենք, թե ինչ կլինի»,- ասել է ԱՄՆ նախագահը «The Mark Levin Show»-ի եթերում:
Զելենսկիի, Եվրահանձնաժողովի նախագահի, ՆԱՏՕ-ի գլխավոր քարտուղարի ու եվրոպական 5 այլ երկրների առաջնորդների հետ Սպիտակ տանը կայացած բանակցություններից հետո Թրամփը Մոսկվա է զանգահարել և սկսել զբաղվել Պուտին-Զելենսկի հանդիպման կազմակերպման հարցերով:
Ավելի ուշ Թրամփի մամուլի խոսնակը հայտնեց, որ Ռուսաստանի և Ուկրաինայի նախագահների հանդիպման ծրագիրը «մշակման փուլում է», քննարկվում են «շատ տարբերակներ»։
Օվալաձև գրասենյակում ցուցադրված Ուկրաինայի քարտեզի ֆոնին Թրամփի և Զելենսկիի լուսանկարը երեկ միջազգային մամուլի ուշադրության կենտրոնում էր։ Դրանում Ռուսաստանի կողմից գրավված տարածքները նշված են մուգ գույնով։
«Ես նախագահին բազմաթիվ մանրամասներ ներկայացրի մարտի դաշտից քարտեզի վրա։ Ի դեպ, շնորհակալություն քարտեզի համար։ Հրաշալի քարտեզ է։ Ես մտածում եմ՝ ինչպես այն ինձ հետ վերցնեմ»,- ասել է Զելենսկին։
Արդյո՞ք 3,5 տարի ձգվող պատերազմի ավարտը մոտ է, թե հակամարտությունը դեռ կշարունակվի։ Քաղաքագետ Գարիկ Քեռյանի կարծիքով՝ Օվալաձև սենյակում դրված քարտեզի մասին Ուկրաինայի ղեկավարի արտահայտած դրական կարծիքը պատերազմի դադարեցման նախադրյալ կարող է լինել։
Հայաստանի Եվրոպական կուսակցության ղեկավար Տիգրան Խզմալյանը, սակայն, թերահավատորեն է մոտենում Թրամփի առաջարկած քարտեզին և ԱՄՆ նախագահի սցենարով պատերազմի ավարտին։ Նա կարծում է, որ Պուտինի համար պատերազմի ընդհատումը նույնքան կործանարար է, որքան դրա շարունակումը, իսկ Զելենսկին զիջումների չի գնա։
Գարիկ Քեռյանն էլ հիշեցնում է Թրամփի հայտարարություններն այն մասին, որ ԱՄՆ-ն այլևս անվճար չի զինելու Ուկրաինային։ Նրա խոսքով՝ պատերազմը կշարունակվի այն պարագայում, եթե Զելենսկին տարածքների լիակատար ազատագրում պահանջի։
Պուտին-Զելենսկի հանդիպման նախաշեմին մոտ 10 երկիր արդեն պատրաստակամություն է հայտնել զորք ուղարկել Ուկրաինա խաղաղության համաձայնագրի կնքումից հետո՝ որպես անվտանգության երաշխիք։
ՌԴ արտաքին գործերի նախարար Սերգեյ Լավրովն այսօր հայտարարել է, թե Մոսկվան կողմ է Եվրոպայից Ուկրաինայի համար կոլեկտիվ անվտանգության երաշխիքներ մշակելուն։ Մոսկվան, սակայն, սկզբունքորեն դեմ է Ուկրաինայի՝ ՆԱՏՕ-ին կամ որևէ այլ ռազմական դաշինքին անդամակցելուն։
ԱՄՆ իշխանություններն էլ դիտարկում են Ուկրաինայի՝ ՆԱՏՕ-ին ինքնաբերաբար անդամակցության հնարավորությունը, եթե Ռուսաստանը խախտի խաղաղության պայմանները։
Կավարտվի՞, արդյոք, շուրջ 3,5 տարի ձգվող պատերազմը և ի՞նչ պայմաններով՝ պարզ կդառնա Պուտին-Զելենսկի դեմ առ դեմ հանդիպման արդյունքում։
Մանրամասները՝ տեսանյութում։
Անի Թամրազյան
