04.08.2026 | 16:47
Վանաձոր և Գյուլագարակ համայնքներին է վերադարձվել 12 հողատարածք․ Գլխավոր դատախազություն
Եկատերինբուրգում թոշակառուն 1 տարի 2 ամսվա պայմանական ազատազրկման է դատապարտվել՝ Ստալինին «մարդասպան և բռնապետ» անվանելու համար
Քաղաքականություն
19.08.2025 | 19:17
Սվերդլովսկի մարզային դատարանը Ցեմենտնի գյուղի 75-ամյա բնակիչ Նիկոլայ Դոլգուշինին դատապարտել է 1 տարի 2 ամիս ժամկետով պայմանական ազատազրկման՝ «համացանցում նացիզմի վերականգնման» գործով (Քրեական օրենսգրքի 354.1 հոդվածի 2-րդ մասի «բ» կետ), գրում է Mediazona-ն։
SOTAvision-ի փոխանցմամբ՝ գործը հարուցվել է երկու մեկնաբանությունների պատճառով՝ 2023 թվականի սեպտեմբերին արված «Երկրորդ համաշխարհային պատերազմը սկսել է բռնապետ և մարդասպան Ստալինը» և 2024 թվականի փետրվարին արված «Դու ստում ես, ռուս խոզ, մարդասպան և բռնապետ Ստալինը պատերազմ հայտարարեց խաղաղ Լեհաստանին» գրառումների համար։
Դոլգուշինը յուրաքանչյուր մեկնաբանությանը կցել է Երկրորդ համաշխարհային պատերազմի սկզբի և Լեհաստանի օկուպացիայի պատմական ժամանակագրությամբ տեսանյութ։
Նրա գրառումները 2024 թվականի օգոստոսին նկատել է Ներքին գործերի նախարարության ծայրահեղականության դեմ պայքարի կենտրոնի («Ե» կենտրոն) աշխատակիցը, և 2025 թվականի մարտին թոշակառուի դեմ քրեական գործ է հարուցվել։
Նիկոլայ Դոլգուշինը չի ընդունել մեղքը։ Նա հայտարարել է, որ ինքը չի արել այդ գրառումները և ենթադրում է, որ «Օդնոկլասնիկի» իր էջը կարող էին կոտրել։
Ըստ աղբյուրի՝ այս տարվա մայիսին թոշակառուին տուգանել են 30 հազար ռուբլու չափով վարչական գործով՝ նույն սոցիալական ցանցում գրառումների պատճառով ռուսական բանակը «վարկաբեկելու» համար։ Տղամարդն այն ժամանակ նույնպես ասել է, որ սոցցանցի իր էջը, հավանաբար, կոտրել են։ Դատարանը նրան մեկուկես տարի արգելել է օգտվել համացանցից և պարտավորեցրել գրանցվել հոգեբուժական կլինիկայում և ամբուլատոր բուժում անցնել։
