Քաղաքականություն
19.08.2025 | 12:28
ԱՊՀ-ն հույս ունի, որ Վաշինգտոնում Հայաստանի և Ադրբեջանի միջև ստորագրված փաստաթղթերը խաղաղության համաձայնագրի հիմք կդառնան։ Այս մասին հայտարարել է ԱՊՀ գլխավոր քարտուղար Սերգեյ Լեբեդևը Համագործակցության անդամ պետությունների մշտական լիազոր ներկայացուցիչների խորհրդի հաջորդ նիստից առաջ, գրում է ՏԱՍՍ-ը։
«Ինչպես ժամանակին բոլորս գոհ էինք Ղրղզստանի և Տաջիկստանի միջև միջպետական սահմանի վերաբերյալ պայմանագրի ստորագրման կապակցությամբ, այնպես էլ հիմա մենք՝ Համագործակցության երկրներում, շատ գոհ ենք այս հռչակագրի ստորագրումից։ Կարծում ենք, որ սա Ադրբեջանի և Հայաստանի միջև տարաձայնությունների վերջնական կարգավորման ու խաղաղության պայմանագրի կնքման ճանապարհին փուլերից մեկն է»,- ասել է նա։
Լեբեդևը հավելել է՝ խաղաղության համաձայնագիրը «հնարավորություն կտա ԱՊՀ բարձրագույն մարմինների ավելի լիարժեք հանդիպումներ անցկացնել այս հանրապետությունների տարածքում»։
«Այս հանրապետությունները կարող են ավելի ակտիվորեն մասնակցել Անկախ պետությունների համագործակցության գործունեությանը»,- ընդգծել է կազմակերպության գլխավոր քարտուղարը։
