Ինչ են քննարկել Թրամփը, Զելենսկին և եվրոպացի առաջնորդները

Զելենսկին Թրամփի հետ զրույցն անվանել է «առայժմ լավագույնը»։ Մերցն ու Մակրոնը հրադադար են պահանջում։ ԱՄՆ-ի և Ուկրաինայի նախագահներն իրենց հանդիպումը դրական են գնահատել։

«Մենք շատ լավ խոսեցինք նախագահ Թրամփի հետ, դա ամենալավ խոսակցությունն էր, կներեք, գուցե լավագույնը դեռ առջևում է», – ասաց Զելենսկին: Նրա խոսքով ՝ հանդիպմանը քննարկվել են նաև Ուկրաինայի անվտանգության երաշխիքները։

Թրամփը վստահություն է հայտնել, որ կողմերը համաձայնության կգան, այդ թվում՝ անվտանգության երաշխիքների շուրջ:

«Սա շատ կարևոր քայլ է. Պուտինը համաձայնել է, որ Ռուսաստանը կընդունի անվտանգության երաշխիքներ Ուկրաինայի համար։ Սա այն առանցքային կետերից մեկն է, որը մենք պետք է քննարկենք, և մենք պատրաստվում ենք քննարկել այն բանակցությունների սեղանի շուրջ, այդ թվում՝ ով և կոնկրետ ինչ է անելու»,- ասել է Թրամփը:

ՆԱՏՕ-ի ղեկավար Մարկ Ռյուտեն այդ հանդիպմանը նշել է Կիևի համար ԱՄՆ-ի կողմից անվտանգության երաշխիքների կարևորությունը: Եվրահանձնաժողովի ղեկավար Ուրսուլա ֆոն դեր Լյայենը համաձայնել է դրան և հավելել, որ անհրաժեշտ է նաև Ռուսաստանից ուկրաինացի երեխաներին վերադարձնել հայրենիք:

Գերմանիայի կանցլեր Ֆրիդրիխ Մերցն իր հերթին ընդգծել է հրադադարի անհրաժեշտությունը, ինչպես նաև հայտարարել է Ռուսաստանի վրա ճնշում գործադրելու կարևորության մասին:

«Ես չեմ կարող պատկերացնել, որ հաջորդ հանդիպումն անցնի առանց հրադադարի ռեժիմի»,- ասել է նա:

«Այս սեղանի շուրջ բոլորը խաղաղության կողմնակից են», – հավաստիացրել է Ֆրանսիայի նախագահ Էմանուել Մակրոնը: Նա նաև ընդգծել է, որ խոսքը Ուկրաինայի և ամբողջ Եվրոպայի անվտանգության մասին է:

Մեկ-երկու շաբաթից պարզ կդառնա՝ կստացվի խաղաղության հասնել, թե ոչ, հայտարարել է Թրամփը: Առաջնորդների հետագա բանակցություններն այսօր կանցնեն փակ դռների հետևում՝ առանց մամուլի։