Զելենսկին Վաշինգտոն է ժամանել

Ուկրաինայի նախագահ Վլադիմիր Զելենսկին ժամանել է Վաշինգտոն, որտեղ հանդիպելու է ԱՄՆ նախագահ Դոնալդ Թրամփի հետ։ Ուկրաինայի առաջնորդն այս մասին օգոստոսի 18-ի առավոտյան հայտարարել է իր տելեգրամյան ալիքում։

Ըստ Թրամփի ժամանակացույցի՝ նա նախ երկկողմ հանդիպում կունենա Զելենսկիի, ապա՝ եվրոպացի առաջնորդների հետ, գրում է Current time-ը։

Թրամփը Truth սոցիալական ցանցում գրել է, որ Զելենսկին «կարող է գրեթե անմիջապես ավարտել պատերազմը Ռուսաստանի հետ, եթե ցանկանա, կամ կարող է շարունակել պայքարը»։

«Հիշե՛ք, թե ինչպես սկսվեց ամեն ինչ։ Ղրիմի վերադարձ չկա, որն Օբամայի կողմից հանձնվեց (12 տարի առաջ՝ առանց մեկ կրակոցի), և ՈՒԿՐԱԻՆԱՅԻ ՄԻԱՑՈՒՄ ՆԱՏՕ-ԻՆ։ Որոշ բաներ երբեք չեն փոխվում»,- հայտարարել է ԱՄՆ նախագահը։

Զելենսկին, իր հերթին, նշել է, որ Ուկրաինան ցանկանում է «արագ և հուսալիորեն ավարտել այս պատերազմը»։

«Եվ խաղաղությունը պետք է երկարատև լինի։ Ոչ թե ինչպես տարիներ առաջ էր, երբ Ուկրաինան ստիպված էր հրաժարվել Ղրիմից և արևելքի մի մասից՝ Դոնբասի մի մասից, և Պուտինն այն օգտագործեց որպես նոր հարձակման ցատկահարթակ։ Կամ երբ Ուկրաինային 1994 թվականին տրվեցին ենթադրյալ «անվտանգության երաշխիքներ», բայց դա չաշխատեց։ Իհարկե, այն ժամանակ չարժեր հրաժարվել Ղրիմից, ինչպես 2022 թվականից հետո ուկրաինացիները չհրաժարվեցին Կիևից, Օդեսայից, Խարկովից։ Ուկրաինացիները պայքարում են իրենց հողերի, իրենց անկախության համար։ Ռուսաստանը պետք է դադարեցնի այս պատերազմը, որն ինքն է սկսել»,- հայտարարել է նա։

Axios-ը, հղում անելով դիվանագիտական աղբյուրներին, նախկինում հայտնել էր, որ Զելենսկիի ու եվրոպացի առաջնորդների հետ հեռախոսազրույցի ժամանակ Թրամփը հայտարարել է, որ կցանկանար օգոստոսի 22-ին գագաթնաժողով անցկացնել Զելենսկիի և Վլադիմիր Պուտինի հետ։ Սակայն Պուտինը պաշտոնապես չի հայտարարել նման հանդիպմանը մասնակցելու մտադրության մասին։

Կիևը, իր հերթին, ասում է, որ մտադիր չէ զորքերը դուրս բերել Դոնբասի՝ իր կողմից վերահսկվող տարածքներից, ինչը, ըստ աղբյուրների, Մոսկվայի կողմից խաղաղություն կնքելու հիմնական պայմաններից մեկն է։