Աթենքի մաքսատունը կանխել է կես տոննա «Կատ» թմրանյութի տարանցիկ փոխադրումը

Աթենքի «Էլեֆթերիոս Վենիզելոս» օդանավակայանում մաքսային ծառայողները բռնագրավել են կես տոննա «Կատ» թմրանյութ, որը թաքցված էր կտորներով լի չորս կոնտեյների մեջ։ Սա վերջին տարիների ամենախոշոր խմբաքանակն է, որի արժեքը գնահատվում է 1,5 մլն եվրո, փոխանցում է Euronews-ը։

Կես տոննա «Կատ» թմրանյութը հայտնաբերվել և առգրավվել է Հունաստանի Պետական եկամուտների անկախ վարչության աշխատակիցների կողմից Աթենքի միջազգային օդանավակայանում։ Այդ մասին պաշտոնապես հայտարարվեց կիրակի օրը։

«Կատ»-ը, որը նաև հայտնի է որպես «բնական կոկաին», հոգեմետ նյութ է, առաջացնում է կախվածություն։ Այն ստացվում է Catha edulis բույսից, որը աճում է Սոմալիում, Արաբական թերակղզու հարավում և Աֆրիկայի արևելյան ափին։

Արգելված նյութը թաքցված էր չորս կոնտեյների մեջ։ Մաքսային փաստաթղթերում բեռը հայտարարված էր որպես վարագույրների, անկողնային սպիտակեղենի և գործվածքների խմբաքանակ։ Այն տարանցիկ անցնում էր Հունաստանի տարածքով՝ Իսրայելից ԱՄՆ տեղափոխվելու համար։

Աթենքի օդանավակայանի մաքսային ծառայության մաքսանենգության դեմ պայքարի բաժնի տեսուչների ընտրովի ստուգման արդյունքում ժամանակավոր պահեստում հայտնաբերվել են չորացված «Կատ»-ի տերևներով լցված փաթեթներ։ Առգրավվածի ընդհանուր քաշը կազմել է կես տոննա։

Ըստ գնահատականների՝ բռնագրված խմբաքանակի արժեքը կազմում է 1 500 000 եվրո։

Սա մաքսային ստուգման արդյունքում առգրավված «Կատ»-ի ամենախոշոր խմբաքանակն է։ Նախորդ ռեկորդը գրանցվել էր 2014 թվականի դեկտեմբերի 4-ին, երբ ոստիկանությունը բռնագրավել էր 458 կգ նյութ։ Վերջին նմանատիպ դեպքը եղել է 2022-ին, երբ առգրավվել էր 34 կգ։