Կիևը կարող է հույս դնել անսասան համերաշխության վրա․ Մերց

Գերմանիայի կանցլեր Ֆրիդրիխ Մերցը մեկնաբանել է ԱՄՆ նախագահի Դոնալդ Թրամփի և Ռուսաստանի ղեկավար Վլադիմիր Պուտինի բանակցությունների արդյունքները, որոնք կայացել են Աանկորիջում։

«Ուկրաինան կարող է հույս դնել մեր անսասան համերաշխության վրա մեր այն ջանքերում, որոնք ուղղված են խաղաղության հասնելուն, որը կապահովի Ուկրաինայի և Եվրոպայի կենսական անվտանգության շահերը»,- ընդգծել է Մերցը։

Գերմանիայի կանցլերը հիշեցրել է, որ Եվրոպայի և ԵՄ առաջնորդները առանձին հայտարարությամբ «ողջունել են նախագահ Թրամփի ջանքերը՝ դադարեցնելու սպանությունները Ուկրաինայում, վերջ դնելու Ռուսաստանի ագրեսիվ պատերազմին և հասնելու արդար և կայուն խաղաղության»։

Եվրոպացի քաղաքական գործիչները խոստացել են «գործակցել նախագահ Թրամփի և Զելենսկու հետ՝ Եվրոպայի աջակցությամբ կազմակերպելու եռակողմ գագաթնաժողով»։

«Ուկրաինան պետք է ունենա անխախտ անվտանգության երաշխիքներ՝ իր ինքնիշխանությունն ու տարածքային ամբողջականությունը արդյունավետորեն պաշտպանելու համար։ Ուկրաինայի զինված ուժերի կամ երրորդ երկրների հետ համագործակցության վրա որևէ սահմանափակում չպետք է լինի․ Ռուսաստանը չի կարող վետոյի իրավունք ունենալ Ուկրաինայի՝ ԵՄ և ՆԱՏՕ անդամակցության ուղու նկատմամբ»,-ասված էր եվրոպական առաջնորդների հայտարարությունում։

«Քանի դեռ սպանությունները Ուկրաինայում շարունակվում են, մենք պատրաստ ենք շարունակել ճնշում գործադրել Ռուսաստանի վրա։ Մենք կշարունակենք խստացնել պատժամիջոցները և ձեռնարկել ավելի լայն տնտեսական միջոցներ՝ ճնշելու Ռուսաստանի ռազմական տնտեսությունը, այնքան ժամանակ, մինչև չհասցվի արդար և կայուն խաղաղություն»,-եզրափակել են եվրոպացի առաջնորդները։