29.04.2026 | 10:59
Վնասվել է Մարտունիի Սուրբ Ներսես Մեծ եկեղեցու գմբեթի խաչը
Ջրհեղեղներ Հնդկաստանում և Պակիստանում․ առնվազն 250 զոհ կա
Քաղաքականություն
16.08.2025 | 16:08
Պակիստանում և Հնդկաստանում հորդառատ անձրևների հետևանքով առաջացած հանկարծակի հեղեղներն ու սելավները խլել են ավելի քան 250 մարդու կյանք, փոխանցում է DW-ն։
Պակիստանի հյուսիսում մեկ օրվա ընթացքում բնական աղետից զոհվել է առնվազն 199 մարդ, տեղեկացրել են երկրի իշխանությունները ուրբաթ՝ օգոստոսի 15-ին։ Տեղական արտակարգ իրավիճակների կառավարման գործակալության տվյալներով՝ նրանցից առնվազն 180-ը մահացել են լեռնային Խայբեր-Պախտունխվա նահանգում, որը սահմանակից է Աֆղանստանին։
Բացի այդ, ինչպես հայտնել է նահանգի կառավարապետ Ալի Ամին Գանդապուրը, Մոհմանդ շրջանում վթարի է ենթարկվել մարդասիրական օգնություն տեղափոխող տարածաշրջանային կառավարության Ми-17 ուղղաթիռը։ Զոհվել են անձնակազմի հինգ անդամները, այդ թվում՝ երկու օդաչուները։ Իշխանությունները կործանումը բացատրում են վատ եղանակային պայմաններով։
Կից գտնվող Պակիստանի Քաշմիրում քաղաքացիական պաշտպանության ծառայության տվյալներով զոհվել է ևս ինը մարդ։ Հյուսիսային Գիլգիթ-Բալթիստան շրջանում զոհվել է ևս հինգ և առնվազն 28 մարդ ստացել է վնասվածքներ, հաղորդել է AFP-ին արտակարգ իրավիճակների կառավարման վարչության ներկայացուցիչը։
Պակիստանում մուսոնների սեզոնին հորդառատ անձրևները սովորական երևույթ են։ Սակայն մասնագետները այս տարվա ամառային մուսոնը համարում են «անսովոր»․ այն արդեն խլել է ավելի քան 500 մարդու կյանք։ Հուլիսին Փենջաբ նահանգում, որտեղ ապրում է Պակիստանի մոտ 255 միլիոնանոց բնակչության գրեթե կեսը, տեղացել է 73%-ով ավելի շատ անձրև, քան նախորդ տարում, և զոհերի թիվը գերազանցել է անցած մուսոնային ամբողջ սեզոնի ցուցանիշը։
Հնդկական Քաշմիրի իշխանությունների տվյալներով՝ առնվազն 60 մարդ զոհվել է Չիսոտի լեռնային գյուղում հանկարծակի ջրհեղեղի հետևանքով։ Եվս 80 մարդ անհայտ կորել է, հայտնել է AFP-ին արտակարգ իրավիճակների կառավարման տեղական ներկայացուցիչ Մոհամմադ Իրշադը։
Վտանգված տարածքը գտնվում է հնդուիստ ուխտավորների ուղու վրա։ Ավելի քան 100 ուխտավորներ մնացել են հոսանքի տակ։ Տարածք են ուղարկվել զինվորականներ և փրկարարներ, քանի որ մուտքը բարդացել էր։ Տարածաշրջանային օդերևութաբանական ծառայությունը զգուշացրել է ուժգին տեղումների և նոր հեղեղների հնարավորության մասին։
Սա Հնդկաստանում օգոստոսին երկրորդ խոշոր հեղեղն է։ Նախորդ շաբաթ սելավները ծածկել էին Հիմալայների Դհարալի գյուղը Ուտարաքհանդ նահանգում։ Զոհերի թիվը, ըստ նախնական տվյալների, գերազանցել է 70-ը, սակայն ճշգրիտ տվյալներ առայժմ չկան։
