«Պուտինը տեղ չունի ամերիկյան հողում»․ բողոքի ակցիա Ալյասկայում ՌԴ նախագահի այցի դեմ․ ՏԵՍԱՆՅՈՒԹ

Ալյասկայի Անքորիջ քաղաքում, ԱՄՆ-ի և Ռուսաստանի նախագահների մասնակցությամբ գագաթնաժողովի նախաշեմին, մի քանի հարյուր մարդ մասնակցել է Ուկրաինայի աջակցության հանրահավաքին։ Հավաքի կազմակերպիչներից է Stand UP Alaska հասարակական կազմակերպությունը, գրում է Current time-ը։

Ցուցարարները եղել են Ուկրաինայի դրոշներով «Ալյասկան Ուկրաինայի հետ», «Լիակատար հաղթանակ Ուկրաինայի համար», «Զավթիչներն իրավունք չունեն քվեարկելու սեղանի շուրջ», «Փառք Ուկրաինային» գրությամբ պաստառներով, իսկ շենքերի ու կամուրջների վրա հայտնվել են կապույտ և դեղին գույների պաստառներ՝ «Ես Ուկրաինայի հետ եմ», «Ուկրաինա և Ալյասկա, Ռուսաստան՝ երբեք», «Պուտինը չի կանգնի Ուկրաինայի մոտ» և այլ կարգախոսներով։

«Մենք դեմ ենք ավտորիտար բռնապետերին մեր նահանգ հրավիրելուն, հատկապես, եթե դա մեր նահանգապետը կամ Կոնգրեսում մեր ներկայացուցիչները չեն։ Նա [Վլադիմիր Պուտինը] ռազմական հանցագործ է և տեղ չունի ամերիկյան հողում»,- «Ուկրինֆորմ»-ին ասել է «Stand Up Alaska»-ի ղեկավար Էրին Ջեքսոն-Հիլը։

Նրա խոսքով՝ օգոստոսի 15-ի երեկոյան նույնպես ակցիա կանցկացվի։

ԱՄՆ և Ռուսաստանի նախագահներ Դոնալդ Թրամփի ու Վլադիմիր Պուտինի հանդիպումը տեղի կունենա Անքորիջում օգոստոսի 15-ին՝ տեղի ժամանակով 11:00-ին (Մոսկվայի ժամանակով՝ 22:00-ին)։ Ռուսական պատվիրակության անդամներն արդեն ժամանել են Ալյասկա, այդ թվում՝ Ռուսաստանի արտաքին գործերի նախարար Սերգեյ Լավրովը, ԱՄՆ-ում Ռուսաստանի դեսպան Ալեքսանդր Դարչիևը և Ռուսաստանի ուղղակի ներդրումների հիմնադրամի ղեկավար Կիրիլ Դմիտրիևը։