Սերբիայում հակակառավարական ցույցերի ընթացքում բախումներ են գրանցվել․ տասնյակ վիրավորներ կան

Սերբիայի մի քանի քաղաքներում հակակառավարական ցույցերի ժամանակ զանգվածային բախումներ են գրանցվել ընդդիմադիր ցուցարարների, նախագահ Ալեքսանդր Վուչիչի կողմնակիցների և ոստիկանության միջև: Իշխանությունների տվյալներով՝ բոլոր կողմերից վիրավորներ կան, հաղորդում է BBC-ի ռուսական ծառայությունը։

Մայրաքաղաք Բելգրադում, Նովի Սադ, Նիշ, Կրագուևաց և մի քանի այլ քաղաքներում ընդդիմադիրները հավաքվել են նախագահի գլխավորած կուսակցության տեղական գրասենյակների մոտ, ճայթուկներ, քարերի և տարբեր առարկաների նետել։ Սերբիայի նախագահ Ալեքսանդր Վուչիչը հայտարարել է, որ Նովի Սադում վիրավորվել է իր 64 կողմնակից։ Վուչիչն անձամբ է դուրս եկել փողոց՝ իր կուսակիցների մոտ, որոնք հավաքվել են կուսակցության Բելգրադի կենտրոնակայանի մոտ:

Սերբիայի ոստիկանապետ Դրագան Վասիլևիչը հայտարարել է, որ միայն հյուսիսային Վրբաս քաղաքում բախումների ժամանակ վիրավորվել է 16 ոստիկան և 50 ցուցարար: Ամբողջ երկրում անկարգությունների և բախումների հետևանքով տուժածների հստակ թիվը հայտնի չէ։

Սերբիայում ուսանողական կազմակերպությունների նախաձեռնած բողոքի ցույցերը սկսվել են անցյալ տարվա նոյեմբերի 1-ին Նովի Սադի երկաթուղային կայարանում բետոնե ծածկի փլուզումից հետո, որի հետևանքով զոհվել է 16 մարդ։ Ցուցարարները պահանջում են պատժել այս ողբերգության համար պատասխանատուներին, խստացնել կոռուպցիայի դեմ պայքարը և նշանակել արտահերթ ընտրություններ։

Մինչ այժմ նրանք հասել են վարչապետի հրաժարականին, սակայն նախագահ Վուչիչը հրաժարական տալու մտադրություն չունի։