06.07.2026 | 23:30
Վաղը Գյումրի, Երևան քաղաքների մի շարք հասցեներում գազանջատումներ կլինեն
Քանի արձանագրություն է կազմվել ամրագոտի չկապելու համար․ վարորդները տուգանվում են ու բողոքարկում. ՏԵՍԱՆՅՈՒԹ
Քաղաքականություն
13.08.2025 | 20:00
Ամրագոտի չկապելու համար 2024 թվականին ավելի քան 171 հազար վարչական իրավախախտման որոշում է կայացվել, իսկ տուգանքների ընդհանուր գումարը գերազանցել է 1,7 միլիարդ դրամը։ Սա նշանակում է՝ օրական միջինում արձանագրվել է ավելի քան 460 խախտում։ 2025 թվականի առաջին վեց ամիսներին արդեն իսկ գրանցվել է 103 հազարից ավելի խախտում, տուգանքի գումարն ավելի քան մեկ միլիարդ դրամ է կազմել։ Factor TV-ն այս տվյալները ստացել է ՆԳՆ-ից, բայց ակնհայտ է, որ պարեկներն արձանագրում են ոչ բոլոր խախտումները։
Factor TV-ն շուրջ մեկ ժամ տևած նկարահանման ընթացքում արձանագրեց թե՛ ամրակապված, թե՛ չամրակապված վարորդների։ Ամրակապված վարորդները մեզ հետ զրույցներում ասացին՝ ամրագոտին կապում են նախ անվտանգության, հետո միայն տուգանքից խուսափելու համար։
Ամրագոտի չկապած վարորդներն էլ կա՛մ առողջական խնդիրներն էին մատնանշում, կա՛մ կարճ երթևեկը։
«Վարորդի ընկեր» ՀԿ նախագահ Տիգրան Քեյանը նկատում է՝ ամրագոտու խախտումը հեշտությամբ կարելի է բողոքարկել, որը հաճախ հօգուտ քաղաքացու է լուծվում։
Հաջորդ խնդիրը, ըստ Քեյանի, այն է, որ վարորդների մեծ մասը չի գիտակցում, թե ինչու է կարևոր ամրակապվել, և հաճախ պատճառաբանում են, թե նեղվում են ամրագոտի կապելուց։ Քեյանն ասում է՝ այս իրավիճակը շտկելու համար կրթական ռեֆորմ է անհրաժեշտ։
Թեև օրենքը թույլ է տալիս պարեկներին ծառայության ընթացքում չամրակապվել, ՆԳ նախարար Արփինե Սարգսյանը երկու ամիս առաջ ԱԺ ՔՊ խմբակցության պատգամավոր Արսեն Թորոսյանին հավաստիացրել էր, որ հանձնարարել է ամրակապվել ծառայության ընթացքում, եթե որևէ բացառիկ իրավիճակ չկա։
ՆԳ նախարարությունը դեռևս 2024-ին հայտարարել էր, որ ըստ վիճակագրության՝ արագության գերազանցումը մահվան ելքով ավտովթարների պատճառներից ամենատարածվածն է, բայց վթարների հետևանքները մեղմվում են, եթե վարորդն ու ուղևորներն ամրակապված են։ Նախարարությունը զգուշացրեց՝ եթե մոտ ապագայում իրավիճակը չփոխվի, իրավախախտումը հայտնաբերելու համար կօգտագործվեն նաև տեսահսկող սարքեր՝ ապահովելով պատասխանատվության անխուսափելիությունը։ ՆԳՆ-ից Factor TV-ին հայտնեցին՝ տեսահսկման համակարգերը դեռ չեն կիրառվում, ձեռք է բերվում Պարեկային ծառայության մեքենաների տանիքին ամրացվող տեսախցիկային համակարգ, որոնց միջոցով ճշգրիտ կֆիքսվի իրավախախտումը։
Մանրամասները՝ տեսանյութում:
Արփի Հակոբյան
