Քաղաքականություն
13.08.2025 | 16:22
Ուկրաինայի ԶՈՒ Գլխավոր շտաբը հաստատել է ՌԴ Բրյանսկի մարզի Վիսոկայա գյուղում գտնվող «Դրուժբա» նավթատարի «Ունեչա» կայանին հարվածը, գրում է Current time-ը։
Կայանի վրա հարձակման մասին հայտնել էին տեղի բնակիչները, ապա այդ մասին գրել էին ուկրաինական լրատվամիջոցները՝ հղում անելով Ուկրաինայի Պաշտպանության նախարարության գլխավոր հետախուզական վարչության աղբյուրներին։
Ըստ Ուկրաինայի զինված ուժերի գլխավոր շտաբի՝ հարձակման հետևանքով վնասներ և խոշորածավալ հրդեհ է գրանցվել պոմպակայանի շենքի տարածքում։ Բացի այդ, տեղեկություններ կան պահուստարանի տարածքում պայթյունների մասին։
«Վնասի հետևանքների վերաբերյալ մանրամասն տեղեկատվությունը ճշտվում է», – ասվում է հաղորդագրության մեջ։
«Ունեչա» նավթամուղը «Դրուժբա» նավթատարի կարևոր հանգույց է, որտեղ այն բաժանվում է հյուսիսային և հարավային ճյուղերի։ Դրա տարեկան հզորությունը շուրջ 60 միլիոն տոննա հումք է։
Մեկ շաբաթ առաջ Ռուսաստանը հարվածել էր Օդեսայի մարզում գտնվող Ուկրաինայի գազատրանսպորտային համակարգի օպերատորի կոմպրեսորային կայանին, որի միջոցով իրականացվում են ադրբեջանական գազի փորձնական մատակարարումները երկիր: Ուկրաինայի էներգետիկայի նախարարությունը հարձակումն անվանել էր «նպատակային» հարված՝ «էներգետիկ համակարգի և միաժամանակ Ադրբեջանի, ԱՄՆ-ի և Եվրոպայի գործընկերների հետ հարաբերությունների դեմ»:
