Կիևը պատրաստ է Մոսկվայի հետ քննարկել օդային հարվածները դադարեցնելու հարցը․ Պոդոլյակ

Ուկրաինան պատրաստ է Ռուսաստանի հետ քննարկել «օդային հրադադարի»  տարբերակը։ Իտալական Corriere della Sera-ին տված հարցազրույցում այս մասին հայտարարել է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը, փոխանցում է DW-ի ռուսական ծառայությունը։

Նրա խոսքով՝ ԱՄՆ-ը Կրեմլին առաջարկել է լիարժեք հրադադար՝ որպես սցենարներից մեկը, ներառյալ՝ հրթիռային հարվածների և անօդաչու թռչող սարքերի հարձակումների դադարեցում, սակայն այս առաջարկը մերժվել է ռուսական կողմից։

«Այս սցենարներից ոչ մեկը չի ընդունվել Ռուսաստանի կողմից: Օդային հարվածները Մոսկվայի կողմից Ուկրաինայի վրա հոգեբանական ճնշման և մեր դիրքորոշման վրա ազդեցության հիմնական գործիք են։ Ռուսաստանը, հավանաբար, չի ցանկանա կորցնել ավիացիան օգտագործելու և անօդաչու թռչող սարքերի զանգվածային օգտագործման հնարավորությունը: Այնուամենայնիվ, Ուկրաինան պատրաստ է քննարկել դա, պատրաստ է դիտարկել այս սցենարը և այն համարում է իրատեսական բանակցությունների սկզբնական փուլ»,- ասել է Պոդոլյակը։

Ուկրաինայի նախագահ Վլադիմիր Զելենսկին օգոստոսի 5-ին հայտարարել էր, որ լիովին աջակցում է ԱՄՆ նախագահի՝ անհապաղ հրադադար հաստատելու առաջարկին։

«Մենք արդեն փորձել ենք բազմաթիվ տարբեր ձևաչափեր՝ հասկանալու համար՝ ինչպես դադարեցնել կրակը, ինչպես դադարեցնել սպանությունները։ Մենք խոսել ենք և առաջարկել Ռուսաստանին լռություն երկնքում՝ ոչ մի հրթիռային և անօդաչու թռչող սարքերի հարված քաղաքացիական ենթակառուցվածքներին և էներգիային։ Այս ամենը խախտվել է ռուսների կողմից»,- ասել է Ուկրաինայի նախագահը։