22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
Ինչ գույք ունի Սերժ Սարգսյանը պաշտոնաթողությունից 7 տարի անց. ՏԵՍԱՆՅՈՒԹ
Հասարակություն
12.08.2025 | 22:21
ՀՀ նախկին նախագահ Սերժ Սարգսյանը պաշտոնաթողությունից հետո առաջին անգամ գույքի և եկամուտների հայտարարագիր է ներկայացրել որպես ՀՀԿ նախագահ։
Սարգսյանը հայտարարագրել է համատեղ սեփականությամբ բնակարան, որը գնել է 1998 թվականին։ Ուշագրավ է, որ այս բնակարանի գտնվելու վայրը նշված է «այլ»։ Նկատենք, որ Հայաստանի որևէ վայրում գտնվելու դեպքում հայտարարագրերում անշարժ գույքի գտնվելու վայրի անունը հրապարակային է, փակ է լինում միայն հասցեն։ Հնարավոր է՝ այս դեպքում խոսքը Սարգսյանի՝ Ստեփանակերտում գտնվող բնակարանի մասին է։
Սերժ Սարգսյանը 90 օրից ավելի տիրապետում է Ջրվեժում առանձնատուն: Սա, ըստ ամենայնի, Ձորաղբյուրի առանձնատունն է, որտեղ գրանցված է Սարգսյանը և որտեղ բնակվելու մասին լուրերը հաստատել էր ՀՀ 3-րդ նախագահի գրասենյակը և ինչը արձանագրել էր նաև Factor TV-ի տեսախցիկը։
Հիշեցնենք, որ այդ առանձնատունը, ըստ մամուլի, փաստացի պատկանել է Սարգսյանի փեսային՝ Միքայել Մինասյանին, որը մեղադրվում է ապօրինի հարստացման մեջ։ 2019 թվականից մոտ 3000 քմ մակերեսով այդ ամառանոցի սեփականատեր է դարձել ոմն Բորիս Գոլովանով։
Սերժ Սարգսյանը 1995-ին նվիրատվություն է ստացել MITSUBISHI մակնիշի ավտոմեքենա, նա նաև տիրապետում MERCEDES-BENZ մակնիշի ավտոմեքենա։
Նա «Արարատբանկ»-ում ունի 107 մլն 998 հազար դրամ ավանդ։ 2024-ի տարեվերջին նրա բանկային հաշվին եղել է 95․3 մլն դրամ, կանխիկ հայտարարագրել է 4․8 մլն դրամ։ 2024-ին Սարգսյանը 29․1 մլն դրամ եկամուտ է ունեցել, որից գրեթե 14 մլն դրամը կենսաթոշակն է, 10․6 մլն դրամը՝ «Արարատբանկ»-ից ստացած տոկոսը, և 4․5 մլն դրամ նվիրատվություն է ստացել աղջկանից՝ Սաթենիկ Սարգսյանից։
Հիշեցնենք, որ Հակակոռուպցիոն դատարանը 2022 թվականից քննում է Սերժ Սարգսյանից և նրա ընտանիքի անդամներից ապօրինի ծագում ունեցող գույքը բռնագանձելու մասին գործը (ՀԿԴ/0024/02/22)։
Գայանե Խաչատրյան
