17.02.2026 | 10:19
Նիկոլ Փաշինյանը և Աննա Հակոբյանը իրենց ամուսնությունը գրանցել են
ՆԱՏՕ-ի գլխավոր քարտուղարը բացառել է Ուկրաինայի օկուպացված տարածքների՝ իրավական առումով ճանաչումը
Քաղաքականություն
11.08.2025 | 16:00
Ռուսաստանի և Ուկրաինայի միջև հնարավոր խաղաղության համաձայնագիրը, որի նախագիծը, հավանաբար, կքննարկվի օգոստոսի 15-ին ԱՄՆ-ի և Ռուսաստանի նախագահներ Դոնալդ Թրամփի և Վլադիմիր Պուտինի միջև Ալյասկայում կայանալիք հանդիպման ժամանակ, չպետք է ներառի Մոսկվայի կողմից ուկրաինական տարածքների բռնակցման իրավական ճանաչում։ Այս մասին հայտարարել է ՆԱՏՕ-ի գլխավոր քարտուղար Մարկ Ռյուտեն, փոխանցում է Moscow Times-ը։
Նա, միաժամանակ, ընդունել է, որ Ռուսաստանը փաստացի վերահսկում է Ուկրաինայի տարածքի մի մասը։
«Խնդիրը [առաջիկա բանակցություններում] կլինի՝ ինչպես շարունակել գործել հրադադարից հետո, այդ թվում՝ ինչ կնշանակի դա Ուկրաինայի անվտանգության երաշխիքների առումով։ Երբ խոսքը տարածքային հարցի մասին է, երբ խոսքը վերաբերում է, օրինակ, ապագա համաձայնագրում Ռուսաստանի կողմից Ուկրաինայի տարածքի մի մասի փաստացի վերահսկման ճանաչմանը, դա պետք է լինի դե ֆակտո ճանաչում, այլ ոչ թե դե յուրե քաղաքական ճանաչում»,- ասել է Ռյուտեն ABC-ին տված հարցազրույցում։
Նրա խոսքով՝ երկու երկրների նախագահների հանդիպումն Ալյասկայում, որին, ինչպես պնդում է Եվրոպան, պետք է մասնակցի նաև Ուկրաինայի նախագահ Վլադիմիր Զելենսկին, Պուտինի համար փորձություն կլինի այն հարցում, թե որքանով է նա լրջորեն ցանկանում դադարեցնել պատերազմը։ Ռյուտեն ընդգծել է, որ Ուկրաինան ինքն է որոշում իր աշխարհաքաղաքական ապագան՝ որպես ինքնիշխան պետություն։ Սա ենթադրում է բանակցություններում «նրա զինված ուժերի չափի վերաբերյալ որևէ սահմանափակումների» բացակայություն, իսկ ՆԱՏՕ-ի պարագայում՝ դաշինքի արևելյան թևում ռազմական ներկայություն։
ՆԱՏՕ-ի գլխավոր քարտուղարը նաև ընդգծել է, որ դաշինքը կշարունակի Կիևին զենք մատակարարել՝ անկախ Պուտինի և Թրամփի հանդիպման արդյունքներից։ Ապագա խաղաղության պայմանագրի շրջանակում Ուկրաինան պետք է իրավունք ունենա ինքնուրույն որոշել ՆԱՏՕ-ին անդամակցության հարցը, ինչին Պուտինը պարբերաբար դեմ է արտահայտվում, ասել է Ռյուտեն։
