Դոնալդ Թրամփը մտադիր է անօթևաններին Վաշինգտոնից հեռու տեղափոխել

ԱՄՆ նախագահ Դոնալդ Թրամփը հայտարարել է, որ մտադիր է տեղափոխել անօթեւաններին Վաշինգտոնից հեռու, այդ մասին նա գրել է Truth Social սոցիալական ցանցում։

«Ես պատրաստվում եմ մեր մայրաքաղաքը դարձնել երբևէ եղածից ավելի անվտանգ ու գեղեցիկ։ Անօթևանները պետք է անմիջապես հեռանան։ Մենք ձեզ կտրամադրենք բնակության վայրեր, բայց մայրաքաղաքից շատ հեռու»,-գրել է Թրամփը։

Թրամփը դիմել է նաև հանցագործներին՝ նշելով, որ նրանց ոչ մի տեղ պետք չէ գնալ, քանի որ «բանտ են նստելու, որտեղ էլ նրանց տեղն է»։ Նա խոստացել է, որ բոլոր միջոցները կկիրառվեն նույն արագությամբ, ինչպես անօրինական միգրանտների հարցում․ «Վերջին մի քանի ամսում մենք անցել ենք միլիոններից՝ մինչև զրո։ Այսպես ավելի հեշտ կլինի, պատրաստ եղեք։ «Լավ տղայի» կերպար չի լինելու։ Մենք ուզում ենք, որ մեր մայրաքաղաքը վերադարձվի մեզ»։

The Washington Post թերթի տվյալներով՝ ԱՄՆ նախագահի վարչակազմը նախատեսում է Թրամփի պաշտոնավարման առաջին տարում արտաքսել մինչեւ 1 միլիոն միգրանտի։

Թերթի աղբյուրների խոսքով՝ Ներքին անվտանգության նախարարության և այլ դաշնային կառույցների պաշտոնյաները փորձում են գտնել եղանակ՝ արտաքսելու 1,4 միլիոնի մի մասին, որոնց նկատմամբ արդեն կան համապատասխան որոշումներ, բայց արտաքսումը չի կատարվում, քանի որ նրանց հայրենի երկրները հրաժարվում են ընդունել։ Վաշինգտոնը նաև բանակցում է երրորդ երկրների հետ՝ արտաքսվածներին ընդունելու մասին։

Թրամփը Մեքսիկայի սահմանին արտակարգ դրություն է հայտարարել հենց այն օրը, երբ 2025թ․ հունվարի 20-ին ստանձնել է նախագահի պաշտոնը։ Նույն օրը նա հրահանգել է զինվորականներ ուղարկել Մեքսիկայի սահման։