24.06.2026 | 12:03
Ալիևը Հայաստանին մեղադրել է իսլամական կրոնական և մշակութային հուշարձանները «ոչնչացնելու» մեջ
Նեթանյահուն ներկայացրել է Գազայի պատերազմը ավարտելու 5 սկզբունքները
Քաղաքականություն
10.08.2025 | 19:33
Իսրայելի վարչապետ Բենյամին Նեթանյահուն կիրակի՝ օգոստոսի 10-ին, Երուսաղեմում կայացած մամուլի ասուլիսում, որը կազմակերպվել էր արտասահմանյան լրատվամիջոցների համար, ներկայացրել է «Պատերազմը ավարտելու հինգ սկզբունք» վերնագրով ծրագիրը Գազայի հատվածի համար։ Նեթանյահուն պահանջում է, որ ՀԱՄԱՍ-ի ահաբեկիչները զինաթափվեն, բոլոր իսրայելցի պատանդները ազատ արձակվեն, Գազայի հատվածը ապառազմականացվի, այնտեղ անվտանգության պատասխանատվությունը կրի Իսրայելը, իսկ իշխանությունը փոխանցվի «ոչ իսրայելական խաղաղ քաղաքացիական վարչակազմին»։
DW-ի փոխանցմամբ՝ Իսրայելի վարչապետը հաստատել է Գազա քաղաքը վերահսկողության տակ վերցնելու պլանը՝ նշելով, որ դա «պատերազմն ավարտելու լավագույն և ամենաարագ միջոցն է»։ Նրա խոսքով, Իսրայելը «այլ ընտրություն չունի, քան գործը հասցնել ավարտին և ամբողջությամբ ջախջախել ՀԱՄԱՍ-ին»։
Նեթանյահուն խոստացել է, որ Իսրայելը կբացի «անվտանգ միջանցքներ» և նոր օգնության կետեր Գազայի հատվածում։
«Մեր նպատակը Գազան գրավելը չէ, մեր նպատակը՝ Գազան ազատագրելն է»,-ասել է նա։
Իսրայելի ֆինանսների նախարարը և «Կրոնական սիոնիզմ» ծայրահեղ աջակողմյան կուսակցության առաջնորդ Բեցալել Սմոտրիչը սոցիալական ցանցերում հրապարակած տեսաուղերձում պահանջել է Նեթանյահուից հրաժարվել Գազա քաղաքը գրավելու պլանից և դրա փոխարեն իրականացնել ավելի խիստ ծրագիր՝ ամբողջական շրջափակման և լիակատար վերահսկողության հաստատման ուղղությամբ։
Սմոտրիչի խոսքով՝ Նեթանյահուն և կառավարությունը ընտրել են «հին ճանապարհը»՝ նկատի ունենալով, որ Իսրայելի Պաշտպանության բանակը (ՑԱՀԱԼ) արդեն նոյեմբեր 2023-ին մտել էր քաղաք, բայց չէր կարողացել ջախջախել ՀԱՄԱՍ-ին։ Նա քննադատել է Նեթանյահուի որոշումը որպես անբավարար։
Օգոստոսի 8-ին Իսրայելի անվտանգության կաբինետը մեծամասնությամբ քվեարկությամբ հաստատել է ռազմական գործողության ընդլայնումը՝ ՀԱՄԱՍ-ին ջախջախելու նպատակով։ Այս պլանը ներառում է Գազա քաղաքի վերահսկողության տակ վերցնելը, ինչը առաջացրել է դժգոհություն ինչպես արտասահմանում, այնպես էլ Իսրայելում։ Օգոստոսի 9-ին հազարավոր մարդիկ դուրս են եկել Թել Ավիվի փողոցներ՝ պահանջելով հրադադար և ՀԱՄԱՍ-ի պահած պատանդների ազատում։
Հիշեցնենք՝ Մերձավոր Արևելքում իրավիճակը կտրուկ սրվել է 2023 թվականի հոկտեմբերի 7-ին, երբ ՀԱՄԱՍ ահաբեկչական խմբավորումը լայնածավալ հարձակում է սկսել Իսրայելի վրա։ Զինյալները զանգվածային հրթիռակոծում են իրականացրել, ներխուժել Իսրայելի տարածք և իրականացրել խաղաղ բնակչության նկատմամբ ժամանակակից Իսրայելի պատմության ամենախոշոր սպանդը՝ սպանելով մոտ 1200 մարդու։ Նրանք նաև ավելի քան 250 պատանդ են վերցրել և տարել Գազայի հատված։ Նրանցից մի մասը փոխանակվել կամ ազատ է արձակվել, մյուսները՝ սպանվել։
Ի պատասխան՝ Իսրայելը պատերազմ է հայտարարել ՀԱՄԱՍ-ին։ Գազայի հատվածում իրականացված ցամաքային գործողությունների և ռմբակոծությունների հետևանքով, ըստ ՀԱՄԱՍ-ին ենթակա առողջապահության նախարարության, զոհվել է ավելի քան 60 հազար պաղեստինցի, ևս ավելի քան 145 հազար վիրավորվել են։ Սակայն այդ գերատեսչությունը չի պարզաբանում, թե ինչպես է կազմվել այս վիճակագրությունը, մասնավորապես՝ քանի զոհեր են եղել իսլամիստ զինյալներից և արդյոք հաշվարկվել են հիվանդանոցներում բնական պատճառներով մահացածները։
