Ռուսաստանի ԱԳՆ-ն մեկնաբանել է ԱՄՆ-ում Հայաստանի և Ադրբեջանի ղեկավարների հանդիպումը

ԱՄՆ-ում Հայաստանի և Ադրբեջանի ղեկավարության հանդիպումն արժանի է դրական գնահատականի, սակայն արտատարածաշրջանային խաղացողների միացումը չպետք է լրացուցիչ դժվարություններ ստեղծի, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

«Հետևողականորեն աջակցում ենք բոլոր ջանքերին, որոնք նպաստում են տարածաշրջանային անվտանգության համար առանցքային այս նպատակին հասնելուն։ Այդ կապակցությամբ Վաշինգտոնում ամերիկյան կողմի միջնորդությամբ հարավկովկասյան հանրապետությունների ղեկավարների հանդիպումն արժանի է դրական գնահատականի։ Հուսով ենք, որ այս քայլը կօգնի խաղաղության օրակարգի առաջմղմանը», – ասված է Զախարովայի մեկնաբանության մեջ։

Նա հավելել է, որ Հարավային Կովկասի խնդիրների լուծման լավագույն տարբերակը հենց տարածաշրջանի երկրների կողմից մշակված լուծումների որոնումն ու իրականացումն է հարևանների՝ Ռուսաստանի, Իրանի, Թուրքիայի աջակցությամբ:

«Արտատարածաշրջանային խաղացողների միացումը պետք է աշխատի խաղաղ օրակարգի ամրապնդման համար և լրացուցիչ դժվարություններ ու բաժանարար գծեր չստեղծի։ Կցանկանայի խուսափել Մերձավոր Արևելքում հակամարտությունների կարգավորմանը արևմտյան աջակցության տխուր փորձից»,- նշել է դիվանագետը։

Մոսկվան լրացուցիչ կվերլուծի Վաշինգտոնից տարածաշրջանային կոմունիկացիաների ապաշրջափակման մասին հայտարարությունները, հայտնել է Զախարովան:

«Այս ոլորտում արդիական են մնում Ռուսաստանի մասնակցությամբ եռակողմ պայմանավորվածությունները, որոնցից կողմերից ոչ մեկը դուրս չի եկել։

Կարևոր է հաշվի առնել նաև ԵԱՏՄ միասնական մաքսային տարածքին Հայաստանի անդամակցության գործոնը, մասնավորապես, հանրապետության տարածքով տարանցիկ բեռնափոխադրումների կազմակերպման հարցում», – ասվում է մեկնաբանության մեջ։

Դիվանագետը նշել է, որ Հարավկովկասյան երկու հանրապետությունների միջև խաղաղության հաստատման գործում կարևորագույն նշանակություն կունենա Ադրբեջանի և Հայաստանի միջև խաղաղության և միջպետական հարաբերությունների հաստատման մասին համաձայնագրի ստորագրումն ու ուժի մեջ մտնելը:

«Երկու երկրների հաշտեցումը պետք է գրված լինի տարածաշրջանային համատեքստում և հիմնված լինի շահերի հավասարակշռության և կողմերի ու հարևան պետությունների առաջնահերթությունների անվերապահ հարգանքի վրա»,- եզրափակել է Զախարովան:

Հիշեցնենք, որ նախօրեին Սպիտակ տանը կայացած Հայաստանի Հանրապետության վարչապետ Նիկոլ Փաշինյանի, Ամերիկայի Միացյալ Նահանգների նախագահ Դոնալդ Թրամփի և Ադրբեջանի Հանրապետության նախագահ Իլհամ Ալիևի եռակողմ հանդիպմանը ստորագրվել է Ադրբեջանի Հանրապետության նախագահի, Հայաստանի Հանրապետության վարչապետի և Ամերիկայի Միացյալ Նահանգների նախագահի համատեղ Հռչակագիրը` Ամերիկայի Միացյալ Նահանգների մայրաքաղաք Վաշինգտոնում տեղի ունեցած հանդիպման արդյունքների մասին: Վարչապետը ներկայացրել է հռչակագրի տեքստը։