Ալիևը կասկած չունի, որ Հայաստանն իր Սահմանադրությունից կբացառի «տարածքային պահանջները»

«Հայկական կողմն ինքն է պատրաստակամություն հայտնել փոփոխություններ կատարել Հայաստանի Սահմանադրության մեջ», – այս մասին հայտարարել է Ադրբեջանի նախագահ Իլհամ Ալիևը, գրում են ադրբեջանական լրատվամիջոցները։

Ըստ Ադրբեջանի ղեկավարի՝ խաղաղության պայմանագրի ստորագրումը հնարավոր կդառնա այն բանից հետո, երբ Ադրբեջանի նկատմամբ «տարածքային պահանջները» բացառվեն Հայաստանի Սահմանադրությունից։

«Որքան շուտ դա տեղի ունենա, այնքան լավ։ Ես կարծում եմ, որ ժամանակ կորցնելու կարիք չկա»,- ընդգծել է Ալիևը։

Խաղաղության պայմանագրի տեքստի նախաստորագրումը Միացյալ Նահանգներում, Ալիևի խոսքով, հիմք է տալիս կարծելու, որ այն կստորագրվի, հակառակ դեպքում, ըստ նրա, դա կլինի Միացյալ Նահանգների նկատմամբ անհարգալից վերաբերմունքի նշան։

«Ես կասկած չունեմ, որ երբ Հայաստանի Սահմանադրությունը փոփոխվի, և հայկական կողմն ինքը հայտարարի նման փոփոխությունների անհրաժեշտության մասին, Ադրբեջանի նկատմամբ «տարածքային պահանջները» կբացառվեն դրանից։ Հակառակ դեպքում, դա, առաջին հերթին, Ամերիկայի Միացյալ Նահանգների նկատմամբ անհարգալից վերաբերմունքի նշան կլինի։ Որովհետև բոլորը գիտեն, և մեր դիրքորոշումը հասկանում են գրեթե բոլոր առաջատար միջազգային դերակատարները, այդ թվում՝ Ամերիկայի Միացյալ Նահանգները։ Երբ խաղաղության համաձայնագիր է ստորագրվում, բոլոր հարցերը պետք է լուծվեն, և մեր նկատմամբ անհիմն «տարածքային պահանջները» պետք է բացառվեն դրանից։ Հետևաբար, ես կասկածներ չունեմ այս հարցում», – ընդգծել է Իլհամ Ալիևը։