Այս օրը պատմության մեջ կմտնի որպես Կովկասի՝ Ռուսաստանից ազատագրման օր․ Սաակաշվիլին՝ Թրամփ-Փաշինյան-Ալիև հանդիպման մասին

Վրաստանի նախկին նախագահ Միխել Սաակաշվիլին անդրադարձել է Վաշինգտոնում սպասվող Թրամփ-Փաշինյան-Ալիև եռակողմ հանդիպմանն ու համատեղ հայտարարությանը։

«Վաղը Վաշինգտոնում տեղի է ունենում պատմական կարևոր իրադարձություն։ Դոնալդ Թրամփի միջնորդությամբ Հայաստանը և Ադրբեջանը կստորագրեն խաղաղության պայմանագիր։Ալիևն ու Փաշինյանը երկար ժամանակ բանակցեցին, բայց ամեն ինչ արագացավ Ամերիկայի նախագահի միջամտության շնորհիվ։ Այսօրը համաշխարհային պատմության մեջ կմտնի որպես Կովկասի՝ Ռուսաստանի ճիրաններից ազատագրման օր»,-գրել է Սաակաշվիլին ֆեյսբուքյան իր էջում։

Նա նշել է, որ «Ռուսաստանը արդեն պաշտոնապես կորցնում է Հարավային Կովկասի երեք երկրներից երկուսի նկատմամբ գերիշխանությունը և դեռևս պահպանում է Վրաստանի նկատմամբ վերահսկողությունը խամաճիկ ռեժիմի միջոցով, սակայն այդ վերահսկողությունը, հավանաբար, երկար չի տևի»։

Հավելենք՝  ՀՀ կառավարության մամուլի ծառայությունը հայտնել էր, որ օգոստոսի 7-8-ին վարչապետ Նիկոլ Փաշինյանն այց կկատարի Ամերիկայի Միացյալ Նահանգներ, որտեղ հանդիպումներ կունենա ԱՄՆ նախագահ Դոնալդ Թրամփի ու Ադրբեջանի նախագահ Իլհամ Ալիևի հետ։

Ըստ ԱՄՆ նախագահի օրակարգի՝Դոնալդ Թրամփն օգոստոսի 8-ին երկկողմ առանձին հանդիպումներ կունենա ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ, ապա համատեղ հայտարարություն կլինի։

WP-ն էլ իր աղբյուրներին վկայակոչելով հայտնել էր, որ Թրամփի հետ ՀՀ-ի և Ադրբեջանի ղեկավարների հանդիպման արդյունքներով, հնարավոր է, հայտարարվի խաղաղության պայմանագրի մասին։

Էմմա Չոբանյան