Թրամփը Պուտինի և Ուիթկոֆի հանդիպումը շատ արդյունավետ է անվանել

ԱՄՆ նախագահ Դոնալդ Թրամփը դրական է գնահատել Ռուսաստանի նախագահ Վլադիմիր Պուտինի և Սպիտակ տան հատուկ բանագնաց Սթիվեն Ուիթքոֆի հանդիպումը:

ԱՄՆ նախագահի խոսքով՝ բանակցություններում «մեծ առաջընթաց» է գրանցվել։

«Իմ հատուկ բանագնաց Սթիվ Ուիթքոֆը հենց նոր չափազանց արդյունավետ հանդիպում ունեցավ Ռուսաստանի նախագահ Վլադիմիր Պուտինի հետ։ Մեծ առաջընթաց է գրանցվել: Դրանից հետո ես տեղեկացրել եմ մեր եվրոպացի դաշնակիցներից մի քանիսին», – գրել է ամերիկացի առաջնորդը Truth Social սոցցանցում։

«Բոլորը համաձայն են, որ պատերազմը պետք է դադարեցվի, և մենք դրա վրա կաշխատենք հաջորդ օրերին և շաբաթներին», – հավելել է նա։

Սպիտակ տան ներկայացուցիչն ավելի վաղ լրագրողներին ասել էր, որ Պուտինի և Ուիթկոֆի հանդիպումը, Վաշինգտոնի վարչակազմի կարծիքով, լավ է անցել, իսկ ռուսական կողմը հետաքրքրություն է ցուցաբերել ԱՄՆ-ի հետ փոխգործակցությունը շարունակելու հարցում:

Հիշեցնենք՝ հուլիսի 14-ին Թրամփը հայտարարել էր, որ 50-օրյա ժամկետ է հատկացնում Ուկրաինայի կարգավորման շուրջ պայմանավորվածություններ ձեռք բերելու համար, ինչից հետո մտադիր է 100 տոկոսի չափով առևտրային մաքսատուրքեր սահմանել Մոսկվայի ևւ նրա առեւտրային գործընկերների դեմ: Հուլիսի 29 – ին ԱՄՆ առաջնորդը հանդես էր եկոլ հայտարարությամբ, որ նշված ժամկետը կրճատում է մինչև 10 օր՝ նշելով, որ չգիտի՝ արդյոք նման քայլը կազդի Ռուսաստանի դիրքորոշման վրա:

Ինչպես հուլիսի 31-ին հայտարարել է ՄԱԿ-ում ԱՄՆ գործերի ժամանակավոր հավատարմատարի տեղակալ Ջոն Քելլին, Թրամփը կարծում է, որ Ռուսաստանը և Ուկրաինան պետք է համաձայնության գան խաղաղ կարգավորման շուրջ մինչև օգոստոսի 8-ը։