Ուկրաինացիները հացադուլ են հայտարարել ՌԴ-ի և Վրաստանի սահմանին

Ռուսաստանից արտաքսվելուց հետո Վրաստանի հետ սահմանին մնացած Ուկրաինայի առնվազն 15 քաղաքացիներ հացադուլ են հայտարարել։ Օգոստոսի 6-ի առավոտյան նրանք համապատասխան հայտարարություն են ներկայացրել Վրաստանի մաքսային ծառայության ղեկավարին։ Այս մասին հաղորդում է «Նովայա գազետա Եվրոպա»-ն՝ հղում անելով աղբյուրներին, փոխանցում է DW-ի ռուսական ծառայությունը։

Ուկրաինացիները պահանջում են, որ Ուկրաինայի հյուպատոսն այցելի Վրաստանի սահմանային «Վերին Լարս-Դարյալի» անցակետի բուֆերային գոտի, որտեղ իրենք գտնվում են։ Նրանք նաև ցանկանում են հասնել բժշկական օգնության, իրենց կալանքի պատճառների և իրավական կարգավիճակի վերաբերյալ բացատրության, Ուկրաինա անցնելու և Ռուսաստան չվերադառնալու երաշխիքներ ստանալ, ինչպես նաև ազատ արձակվել նկուղից, որտեղ պահվում են։

Հացադուլի մասին հայտարարությունն ուղարկվել է նաև Վրաստանում Ուկրաինայի դեսպանատուն, Վրաստանի օմբուդսմենի գրասենյակին, Վրաստանի գլխավոր դատախազությանը, Amnesty International և Human Rights Watch իրավապաշտպան կազմակերպություններին, ինչպես նաև Վրաստանում ՄԱԿ-ի փախստականների հարցերով գործակալությանը։

«Դարյալին» միակ սահմանային անցակետն է, որով Ռուսաստանից արտաքսված ուկրաինացիները կարող են լքել երկիրը: Հունիսի 5-ից ի վեր մոտ 100 ուկրաինացիներ, հիմնականում՝ տղամարդիկ, պահվում են նեղ, առանց պատուհանների նկուղում, շատերը՝ առանց փաստաթղթերի: Նրանցից մի քանիսը նախկին բանտարկյալներ են, որոնք արտաքսվել են Ռուսաստանից իրենց պատիժը կրելուց հետո, մյուսները՝ քաղաքացիական անձինք, որոնք դեմ են արտահայտվել Ռուսաստանի կողմից Ուկրաինա ներխուժմանը:

Վրաստանի իշխանությունները հայտարարում են, որ ձերբակալված ուկրաինացիների մեծ մասն ունեցել է հատկապես ծանր հանցագործությունների համար քրեական անցյալ, չունի սահմանը հատելու համար անհրաժեշտ փաստաթղթեր, և նրանց մուտքը երկիր «սպառնալիք է ներկայացնում»։

Օգոստոսի 3-ին Ուկրաինայի ապատեղեկատվության դեմ պայքարի կենտրոնը հերքել էր Մոսկվայի կողմից տարածված տեղեկատվությունը Վրաստանի սահմանից իր 90 քաղաքացիներին չընդունելու մասին։

Կիևը հայտարարել է, որ ուկրաինական կողմը համակարգված աշխատանք է տանում քաղաքացիների վերադարձի ուղղությամբ՝ հաստատված քաղաքացիության առկայության դեպքում։

Թարգմանությունը՝ Էմմա Չոբանյանի