Բաքվում նոյեմբերին տեղի կունենա Եվրոպայի ռաբբիների համաժողովը․ կքննարկվի Ադրբեջանի միացումը Աբրահամի համաձայնագրերին

Ադրբեջանի մայրաքաղաքում նոյեմբերի 4-6-ը տեղի կունենա Եվրոպայի ռաբբիների ներկայացուցչական համագումարը, որին կմասնակցեն տարբեր երկրներից ժամանած ավելի քան 500 պատվիրակներ, գրում է vesty.co.il-ը։

Նշվում է, որ Եվրոպական ռաբբիների համագումարի 70-ամյակին նվիրված միջոցառումն առաջին անգամ կանցկացվի մահմեդական երկրում: Կքննարկվի Աբրահամի համաձայնագրերի ընդլայնումը՝ Ադրբեջանի հնարավոր մասնակցությամբ։

Նախատեսվում է նաև Ադրբեջանի նախագահ Իլհամ Ալիևի մասնակցությունը: Բաքվում անցկացված նախորդ համագումարը չեղարկվել էր 2023 թվականի հոկտեմբերի 7-ին Իսրայելի վրա ՀԱՄԱՍ-ի հարձակման պատճառով:

Օրերս Reuters գործակալությունը, վկայակոչելով իր աղբյուրներին, հայտնել էր, որ Թրամփն Ադրբեջանի ու Կենտրոնական Ասիայի երկրների հետ քննարկում է Աբրահամի համաձայնագրերին նրանց միանալու հարցը։ Սակայն դրա համար ԱՄՆ-ը պայման է դնում, մասնավորապես, Ադրբեջանի առաջ՝ պահանջելով  կարգավորել հարաբերությունները Հայաստանի հետ։

Լրատվամիջոցը նշել էր, որ հարցը քննարկվել է Թրամփի հատուկ ներկայացուցիչ Սթիվ Ուիթքոֆի՝ մարտին Բաքու կատարած այցի ժամանակ։

Հավելենք, որ Աբրահամի համաձայնագրերը երկկողմանի համաձայնություններ են արաբա-իսրայելական հարաբերությունների կարգավորման վերաբերյալ, որոնք ստորագրվել են Իսրայելի, Արաբական Միացյալ Էմիրությունների, Իսրայելի և Բահրեյնի միջև 2020 թվականի սեպտեմբերի 15-ին՝ Դոնալդ Թրամփի պաշտոնավարման առաջին ժամկետում։ Ըստ փաստաթղթի՝ երկրները հաստատում են դիվանագիտական հարաբերություններ, ճանաչում միմյանց ինքնիշխանությունը։

Թարգմանությունը՝ Էմմա Չոբանյանի