Կրեմլը հայտնում է Պուտին-Ուիթկոֆ հանդիպման ժամանակ Թրամփից ստացված և նրան ուղարկված «ազդանշանների» մասին

Ռուսաստանի նախագահ Վլադիմիր Պուտինը և ԱՄՆ նախագահի հատուկ ներկայացուցիչ Սթիվ Ուիթկոֆը քննարկել են ուկրաինական ճգնաժամը, ինչպես նաև ԱՄՆ-ի և Ռուսաստանի միջև ռազմավարական համագործակցության հնարավոր զարգացման հեռանկարները։ Այս մասին լրագրողներին հայտնել է ՌԴ նախագահի օգնական Յուրի Ուշակովը, փոխանցում է BBC-ի ռուսական ծառայությունը:

«Մեր կողմից, մասնավորապես, որոշ ազդանշաններ են փոխանցվել ուկրաինական հարցի վերաբերյալ։ Համապատասխան ազդանշաններ են ստացվել նաև նախագահ Թրամփից։ Իրավիճակն այժմ այնպիսին է, որ մեր նախագահն ունի ամբողջական տեղեկատվություն, այսինքն՝ մեր ազդանշանները, ազդանշաններ նախագահ Թրամփից։ Եվ Թրամփը դեռևս չի տեղեկացվել այս հանդիպման արդյունքների մասին։ Հետևաբար, ես կխուսափեի ավելի մանրամասն մեկնաբանություններից։ Կտեսնենք, թե երբ Ուիթկոֆը կկարողանա զեկուցել Թրամփին այսօր տեղի ունեցած զրույցի մասին։ Դրանից հետո, իհարկե, մենք կկարողանանք լրացնել իմ մեկնաբանություններն ավելի էական բանով»,- ասել է Ուշակովը։

Պաշտոնյան զրույցը «շատ օգտակար և կառուցողական» է անվանել։

«Եթե նշենք [Պուտինի և Ուիթկոֆի զրույցի] թեմաները, ապա, առաջին հերթին, իհարկե, դա ուկրաինական ճգնաժամն է։ Երկրորդ թեման ԱՄՆ-ի և Ռուսաստանի միջև ռազմավարական համագործակցության հնարավոր զարգացման հեռանկարներն են»,- լրագրողներին ասել է Ուշակովը։

Ռուսաստանի նախագահի հատուկ ներկայացուցիչ Կիրիլ Դմիտրիևն էլ իր տելեգրամի ալիքում գրել է․ «Ռուսաստանի և ԱՄՆ-ի միջև կառուցողական երկխոսությունը շարունակվում է»։

Ամերիկյան կողմը դեռևս որևէ մեկնաբանություն չի արել։

Հիշեցնենք, որ Պուտինի ու Թրամփի բանագնացի հանդիպումը տեղի է ունեցել Կրեմլում, այն տևել է շուրջ 3 ժամ։

Թարգմանությունը՝ Էմմա Չոբանյանի