06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Արաբկիրի՝ մեկ տարի առաջ կալանավորված թաղապետ Արամ Ազատյանը վերադարձել է աշխատանքի
Քաղաքականություն
06.08.2025 | 14:25
Մեկ տարի առաջ կալանավորված Արաբկիրի թաղապետ Արամ Ազատյանը վերադարձել է աշխատանքի։ Factor.am-ի այս տեղեկությունը հաստատեց Երևանի քաղաքապետի մամուլի քարտուղար Հայկ Կոստանյանը։
Ազատյանի պաշտպան Արթուր Պիվազյանը Factor.am -ին հայտնեց, որ իր պաշտպանյալի նկատմամբ կիրառվել են վարչական հսկողություն, գրավ և բացակայելու արգելք խափանման միջոցները։ Մինչ այս խափանման միջոցների կիրառումն Ազատյանն ավելի քան 20 օր տնային կալանքի տակ է եղել։ Արամ Ազատյանը մեղադրվում է պաշտոնեական դիրքի չարաշահման, կաշառք ստանալու համար։
«Ապացույցները թյուրիմացություն են, բնականաբար, Ազատյանը չի ընդունում մեղադրանքը»,- հայտարարեց փաստաբանը։ Պիվազյանը նաև ասաց, որ դիմել են Եվրադատարան, դիմումը մուտք է եղել, այլ տեղեկություն չունեն։
Նշենք, որ բացի Արամ Ազատյանից կալանավորվել էին նաև նրա տեղակալներ Գեղամ Կարապետյանն ու Դավիթ Բալասանյանը։ Իսկ այս ընթացքում Արաբկիր վարչական շրջանի ղեկավարի պարտականությունները կատարում էր Սուրեն Վարոսյանը։ Հայկ Կոստանյանն ասաց, որ Վարոսյանը զբաղեցրել է թաղապետի տեղակալի պաշտոնը, որի վրա էլ Ազատյանի բացակայության ժամանակ դրվել են թաղապետի պարտականությունները։ Այս պահի դրությամբ թաղապետի գործառույթները կատարում է Արամ Ազատյանը։
Արփի Հակոբյան
