07.09.2026 | 17:42
Բաքուն Սոթքի հանքավայրի ադրբեջանական հատվածում իրականացրել է առաջին հորատապայթեցման աշխատանքները
Պուտինը չի ուզում «զայրացնել» Թրամփին, բայց նա չի դադարեցնի պատերազմը, քանի որ «ո՛չ բանակը, ո՛չ ժողովուրդը» նրան չեն հասկանա. Reuters
Քաղաքականություն
05.08.2025 | 22:00
ՌԴ նախագահ Վլադիմիր Պուտինը չի ցանկանում «զայրացնել» ԱՄՆ նախագահ Դոնալդ Թրամփին և հասկանում է, որ նա կարող է բաց թողնել Վաշինգտոնի և ընդհանրապես Արևմուտքի հետ հարաբերությունները բարելավելու հնարավորությունը, սակայն նրա համար ռազմական նպատակներն ավելի կարևոր են։ Այս մասին գրում է Reuters-ը՝ հղում անելով Կրեմլին մոտ կանգնած աղբյուրներին, փոխանցում է Meduza-ն։
Զրուցակիցներից մեկի խոսքով՝ Պուտինի նպատակն է ամբողջությամբ գրավել Դոնեցկի, Լուգանսկի, Զապորոժիեի և Խերսոնի մարզերը, և միայն դրանից հետո սկսել խաղաղության համաձայնագրի շուրջ բանակցություններ։ Աղբյուրի պնդմամբ՝ ռուս-ուկրաինական ներկայիս բանակցությունները Մոսկվայի փորձն են՝ համոզելու Թրամփին, որ Պուտինը չի մերժում խաղաղության համաձայնագիրը։
Լրատվամիջոցի աղբյուրներից մեկը հայտնել է, որ Պուտինը մտահոգված է Վաշինգտոնի հետ հարաբերությունների վատթարացմամբ, և որ բանակցություններում առաջընթացի բացակայությունը նյարդայնացնում է Թրամփին։ Սակայն հաշվի առնելով ռուսական զորքերի առաջխաղացումն Ուկրաինայում, Պուտինը չի կարծում, որ հիմա պատերազմը դադարեցնելու ժամանակն է, քանի որ «ո՛չ բանակը, ո՛չ էլ ժողովուրդը» նրան չեն հասկանա։
Մեկ այլ աղբյուրի խոսքով էլ՝ Պուտինը գնահատում է իր հարաբերությունները Թրամփի հետ, բայց նա «չի կարող թույլ տալ ավարտել պատերազմը միայն այն պատճառով, որ Թրամփն է դա ուզում»։
Reuters-ի աղբյուրների փոխանցմամբ՝ Պուտինը չի հավատում, որ Թրամփի կողմից խոստացված ԱՄՆ նոր պատժամիջոցները լուրջ ազդեցություն կունենան Ռուսաստանի վրա։
Բացի այդ, լրատվամիջոցի աղբյուրը նաև ասել է, թե Ռուսաստանի գլխավոր շտաբը, իբր, Պուտինին ասել է, որ ուկրաինական ճակատը կփլուզվի երկու-երեք ամսից։
Հուլիսի վերջին Թրամփը Ռուսաստանի համար սահմանել է 10-օրյա ժամկետ՝ օգոստոսի 8-ը՝ Ուկրաինայի հետ հրադադարի համաձայնագրի հասնելու համար։
ԱՄՆ նախագահը հայտարարել էր, որ այդ ժամկետից հետո Վաշինգտոնը Մոսկվայի նկատմամբ կկիրառի «մաքսատուրքեր և այլ միջոցառումներ», սակայն չգիտի՝ դրանք կազդե՞ն Ռուսաստանի վրա, թե ոչ։ Սկզբում Թրամփը Ռուսաստանին տվել էր 50 օր՝ սկսած հուլիսի 14-ից, բայց հետո կրճատել է այդ ժամկետը։
Վլադիմիր Պուտինն օգոստոսի 1-ին հայտարարել էր, որ Մոսկվային «անհրաժեշտ է երկարատև և կայուն խաղաղություն՝ լավ, հիմնարար հիմքերի վրա, որը կբավարարի և՛ Ռուսաստանին, և՛ Ուկրաինային»։ Նա ընդգծել էր, որ Ռուսաստանի նպատակները պատերազմում մնացել են նույնը՝ Ուկրաինան պետք է ճանաչի օկուպացված տարածքները որպես ռուսական և հրաժարվի ՆԱՏՕ-ին անդամակցելու ծրագրերից, իսկ Արևմուտքը պետք է վերացնի պատժամիջոցները։
Թարգմանությունը՝ Էմմա Չոբանյանի
