29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Կամչատկայի հարավային մասը ուժեղ երկրաշարժից հետո տեղաշարժվել է գրեթե երկու մետրով
Քաղաքականություն
05.08.2025 | 20:49
Կամչատկայի թերակղզու հարավային մասը գրեթե երկու մետրով տեղաշարժվել է դեպի հարավ-արևելք հզոր երկրաշարժից հետո։ Այս մասին հայտնել է Ռուսաստանի գիտությունների ակադեմիայի Միասնական երկրաֆիզիկական ծառայության Կամչատկայի մասնաճյուղը՝ հիմնվելով գեոդինամիկ դիտարկումների արդյունքների վրա, փոխանցում է Current time-ը։
«Հուլիսի 30-ի երկրաշարժից հետո առավելագույն կոսեյսմիկ տեղաշարժերը դիտվել են թերակղզու հարավային մասում։ Այնտեղ դրանք կազմել են գրեթե երկու մետր, ինչը համեմատելի է 2011 թվականին Ճապոնիայի Տոհոկու քաղաքում տեղի ունեցած երկրաշարժից հետո հորիզոնական տեղաշարժերի հետ։ Պետրոպավլովսկի կայանների կլաստերը (համապատասխանաբար՝ Պետրոպավլովսկ-Կամչատկին) տեղաշարժվել են մի փոքր ավելի համեստ»,- ասվում է զեկույցում։
Հուլիսի 30-ի առավոտյան Կամչատկայի ափերի մոտ երկրաշարժ է տեղի ունեցել։ Ռուսաստանի գիտությունների ակադեմիայի Միասնական երկրաֆիզիկական ծառայության Կամչատկայի մասնաճյուղը հայտարարել էր, որ սա 1952 թվականից ի վեր ամենաուժեղ երկրաշարժն է։
ԱՄՆ երկրաբանական ծառայությունը երկրաշարժի ուժգնությունը գնահատել էր 8,8 մագնիտուդ՝ ըստ Ռիխտերի սանդղակի։ Այն առաջացրել է մի քանի ցունամիի ալիքներ, որոնք մասամբ հեղեղել էին Սևերո-Կուրիլսկի նավահանգիստը և «Ալաիդ» ձկնորսական ձեռնարկությունը։
Երկրաշարժից հետո գիտնականները գրանցել էին Կամչատկայում Կրաշենիննիկով հրաբխի առաջին ժայթքումը։ Այն սկսվել է օգոստոսի 2-ին, որի արդյունքում մինչև չորս կիլոմետր բարձրությամբ մոխիր է արտանետվել։
Ռուսաստանի գիտությունների ակադեմիայի հրաբխագիտության և սեյսմոլոգիայի ինստիտուտի Կամչատկայի հրաբխային ժայթքումների արձագանքման խումբը նշել էր, որ հրաբուխը նախկինում ժայթքել է միայն 1463 թվականին։
Թարգմանությունը՝ Էմմա Չոբանյանի
