12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Բրազիլիայի նախկին նախագահ Բոլսոնարոն տնային կալանքի տակ է
Քաղաքականություն
05.08.2025 | 11:52
Բրազիլիայի նախկին նախագահ Ժաիր Բոլսոնարոյի նկատմամբ տնային կալանք է սահմանվել, գրում է DW-ի ռուսական ծառայությունը։
Նրան արգելվել է օգտագործել բջջային հեռախոսներ, թույլատրվում է շփվել միայն սահմանափակ թվով մարդկանց հետ։ Այս որոշումը կայացրել է Բրազիլիայի Գերագույն դատարանի դատավոր Ալեքսանդր դի Մորաեշը։
Մորաեշը դատավճիռը հիմնավորել է այն փաստով, որ Բոլսոնարոն օգոստոսի 3-ին համացանցի միջոցով դիմել է իր կողմնակիցներին, և ելույթի հատվածներ հրապարակվել են սոցիալական ցանցերում։ Դատավորը սա համարել է արդարադատության համակարգի վրա ճնշում գործադրելու փորձ։
Բրազիլիայի 70-ամյա նախկին նախագահը մեղադրվում է իրեն հաջորդող Լուիս Ինասիո Լուլա դա Սիլվայի կառավարությունը տապալելու դավադրության մեջ՝ 2022 թվականի ընտրություններում պարտվելուց հետո։ 2023 թվականի հունվարի 8-ին Բոլսոնարոյի կողմնակիցները ներխուժել էին Բրազիլիայի Կոնգրես, Գերագույն դատարան և նախագահական պալատ՝ Լուլա դա Սիլվայի կողմից պաշտոնը ստանձնելուց կարճ ժամանակ անց։
Հուլիսի 19-ին Բոլսոնարոյին տրվել էր էլեկտրոնային ապարանջան, նրան պարտավորեցրել էին գիշերը տանը մնալ, արգելվել էր օգտվել սոցիալական ցանցերից։ Բոլսոնարոյի դեմ դատավարությունը մտել է եզրափակիչ փուլ։ Նախկին նախագահը մեղադրվում է «դեմոկրատական իրավական կարգը ոչնչացնելու» փորձի մեջ։
Ինքը՝ Բոլսոնարոն, հերքում է բոլոր մեղադրանքները։ Հուլիսի 30-ին ԱՄՆ իշխանությունները պատժամիջոցներ էին կիրառել դատավոր Մորաեշի դեմ՝ նրան մեղադրելով Բոլսոնարոյի նկատմամբ քաղաքական հետապնդման մեջ։
Թարգմանությունը՝ Էմմա Չոբանյանի
