Կիևը հայտնել է Ղրիմի օդանավակայանում կործանիչի ոչնչացման և չորս ինքնաթիռի վնասման մասին

Ուկրաինայի անվտանգության ծառայությունը (ՈւԱԾ) հայտարարել է բռնակցված Ղրիմի Սակի ռազմական օդանավակայանում ռուսական Սու-30ՍՄ կործանիչի ոչնչացման մասին, փոխանցում է Current time-ը։

Ըստ ուկրաինական հատուկ ծառայության՝ անօդաչու թռչող սարքի հարվածի հետևանքով խփվել է, ընդհանուր առմամբ, հինգ ռուսական ինքնաթիռ. ոչնչացված մեկից բացի՝ վնասվել է ևս մեկ Սու-30ՍՄ կործանիչ, ինչպես նաև երեք Սու-24 ինքնաթիռներ։ Բացի այդ, ըստ ուկրաինական կողմի պնդման, օդանավակայանի տարածքում խփվել է ավիացիոն զենքի մի ամբողջ համալիր։

Տեղական տելեգրամ ալիքները հաղորդել են Ղրիմում գիշերը, այդ թվում՝ Սաքսի շրջանում տեղի ունեցած պայթյունների մասին: Ռուսաստանի Պաշտպանության նախարարությունը հայտնել է օգոստոսի լույս 4-ի գիշերը Սև ծովի վրայով՝ 18, և բռնակցված Ղրիմի վրա՝ 11-ի անօդաչուի խոցման մասին։

Ռուսական կողմը դեռևս չի մեկնաբանել ուկրաինական հատուկ ծառայության հաղորդագրությունը:

Բացի այդ, ուկրաինական զինվորականները պնդում են, որ կիրակի անօդաչուները հարձակվել են Կրասնոդարի մարզի Սոչիի օդանավակայանի վառելիքի և լիցքավորման համալիրի վրա։ Կառույցի տարածքում խոշոր հրդեհ է բռնկվել, ասվում է Ուկրաինայի զինված ուժերի գլխավոր շտաբի հայտարարության մեջ։ Նախօրեին տեղական իշխանությունները և փրկարարները հայտնել էին հրդեհի մասին, որը տեղի է ունեցել Սոչիում նավթամբարի վրա ուկրաինական անօդաչու թռչող սարքերի հարձակումից հետո։

Հիշեցնենք, որ 2025 թվականի հունիսի 1-ին Ուկրաինայի անվտանգության ծառայությունը իրականացրել էր  «Սարդոստայն» գործողությունը, որի ընթացքում անօդաչու թռչող սարքերը հարձակվել էին  Ռուսաստանի Իրկուտսկի, Իվանովոյի, Մուրմանսկի և Ռյազանի մարզերի ռազմավարական ավիացիայի օդանավակայանների վրա։

Թարգմանությունը՝ Էմմա Չոբանյանի