12.09.2026 | 15:44
Պուտինը սպառնում է Եվրոպային պատերազմով՝ Ուկրաինա զորքեր մտցնելու դեպքում․ DW
Մոսկվայում մեկնարկել է «Կրոկուս»-ի ահաբեկչության գործով դատական գործընթացը․ մեղադրյալի աթոռին է 19 մարդ, կազմակերպիչները չեն հայտնաբերվել
Քաղաքականություն
04.08.2025 | 16:06
Երկրորդ Արևմտյան շրջանի զինվորական դատարանը սկսել է քննել Մոսկվայի մարզի «Կրոկուս Սիթի Հոլ» համերգասրահում տեղի ունեցած ահաբեկչական հարձակման վերաբերյալ քրեական գործը, փոխանցում է Meduza-ն։
2024 թվականի մարտի 22-ին, «Պիկնիկ» խմբի ելույթի մեկնարկից առաջ, զինված ահաբեկիչները ներխուժել էին «Կրոկուս» և կրակ բացել մարդկանց ուղղությամբ։ Շենքը հրդեհվել էր։ Հարձակման հետևանքով զոհվել է 149 մարդ, մեկը՝ անհետ կորել։ Հետաքննության տվյալներով՝ ավելի քան 600 մարդ վիրավորվել է։
Գործով 19 մեղադրյալ կա՝ չորս ենթադրյալ հարձակվող և 15 հանցակից, այդ թվում՝ այն բնակարանի սեփականատերը, որտեղ ապրել են մեղադրյալները։
Հետաքննությունը, ըստ BBC-ի ռուսական ծառայության, միավորել է տեղի ունեցածի երկու վարկածները մեկում և փորձում է ապացուցել, որ «Կրոկուս»-ի վրա հարձակումը կազմակերպել է «Վիլայաթ Խորասան» ահաբեկչական կազմակերպությունը, որը «Իսլամական պետության» մաս է կազմում։
Միաժամանակ, քննիչները պնդում են, որ ահաբեկչական հարձակման կազմակերպմանը մասնակցել են օտարերկրյա հետախուզական ծառայությունները, հարձակումը կազմակերպվել է «Ուկրաինայի բարձրագույն ղեկավարության շահերից ելնելով»։ Կիևի կողմից ահաբեկչական հարձակմանը ներգրավվածության վարկածն անմիջապես առաջ են քաշել Ռուսաստանի իշխանությունները, այդ թվում՝ նախագահ Վլադիմիր Պուտինը։ Ուկրաինան հերքում է մեղադրանքները։
Ահաբեկչական հարձակման կազմակերպիչները դեռևս չեն հայտնաբերվել։ ՏԱՍՍ-ը գրում է, որ «Վիլայաթ Խորասան» ահաբեկչական խմբավորման երկու կազմակերպիչների և չորս անդամների նկատմամբ հետաքննությունը շարունակվում է։
Դատավարությունը տեղի է ունենում Մոսկվայի քաղաքային դատարանի շենքերից մեկում՝ դատավարության մասնակիցների մեծ թվի պատճառով: Գործով տուժողներ են համարվում երկու հազարից ավելի մարդիկ: Նախնական լսումներին եկել է մոտ 150 մարդ, հաղորդում է «Ինտերֆաքս»-ը։
Գործի վերաբերյալ առաջին լսումներն անցկացվել են փակ դռների հետևում՝ հետաքննության գաղտնիության պատճառով։ Օգոստոսի 4-ին լսումներն անցկացվում են բաց ռեժիմով։
Բաց նիստի մեկնարկից կարճ ժամանակ անց դատարանը փակել է դատավարությունը՝ քննիչների խնդրանքով։
Այս հարձակումից հետո Ռուսաստանի իշխանությունները խստացրել են քաղաքականությունը միգրանտների նկատմամբ։
Թարգմանությունը՝ Էմմա Չոբանյանի
