06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Ավստրալիայում 1980-ականներից ի վեր ամենաառատ ձյունն է տեղացել․ ՏԵՍԱՆՅՈՒԹ
Քաղաքականություն
04.08.2025 | 20:48
Ավստրալիայի արևելյան մի քանի քաղաքներում տասնամյակներ ի վեր ամենաուժեղ ձյունն է տեղացել, ինչը ջրհեղեղների, մեքենաների արգելափակման և հազարավոր տների էլեկտրամատակարարման խափանման պատճառ է դարձել, գրում է The Independent-ը։
Նոր Հարավային Ուելսի հյուսիսային հատվածներում սառը օդային հոսանքի հետևանքով մինչև 40 սմ (16 դյույմ) ձյուն է տեղացել, ինչը 1980-ականների կեսերից ի վեր ամենաառատն է եղել, հայտնել է Ավստրալիայի օդերևութաբանության բյուրոյի (BoM) մասնագետ Միրիամ Բրեդբերին։ Նա նշել է, որ ձյուն է տեղացել նաև հարևան Քվինսլենդ նահանգի տարածքում՝ 10 տարվա ընթացքում առաջին անգամ։
Բրեդբերին ընդգծել է՝ կլիմայի փոփոխությունը վերջին տարիներին Ավստրալիայի եղանակը դարձրել է ավելի անկայուն, բայց պատմականորեն նման իրադարձություն տեղի է ունեցել մի քանի անգամ։
«Այս իրադարձությունն անսովոր է դարձնում ոչ միայն ձյան քանակությունը, այլև հյուսիսային սարահարթերի բավականին մեծ մասը ծածկող տարածվածությունը»,- ասել է նա։
Մյուս տարածքներում տեղացած ուժեղ անձրևների պատճառով Նոր Հարավային Ուելսի նահանգի արտակարգ իրավիճակների ծառայությունն արձագանքել է ավելի քան 1455 միջադեպի։ Ավելի քան 100 մեքենա արգելափակվել է, փոթորիկները վնասել են շենքերը, ջրհեղեղի մասին մի քանի լուրջ նախազգուշացումներ են տրվել։
ABC պետական հեռարձակողի հաղորդմամբ՝ տասնյակ հազարավոր տներ գիշերը մնացել են առանց էլեկտրաէներգիայի։ Ավստրալիայի ամենախիտ բնակեցված Նոր Հարավային Ուելսի ոստիկանությունը հայտնել է, որ շաբաթ երեկոյան մի մեքենա մնացել է հեղեղի մեջ, իսկ 20-ամյա մի կնոջ հեղեղը քշել է։ Որոնողական աշխատանքները շարունակվել են նաև կիրակի օրը։
Թարգմանությունը՝ Էմմա Չոբանյանի
