12.01.2026 | 21:27
Դանիան և Գրենլանդիան չորեքշաբթի ԱՄՆ-ի հետ բանակցություններ կանցկացնեն
Եմենի ափերի մոտ առնվազն 68 աֆրիկացի միգրանտ է զոհվել նավակի խորտակումից
Քաղաքականություն
04.08.2025 | 19:30
ՄԱԿ-ը հայտնում է, որ կիրակի Եմենի ափերի մոտ միգրանտների նավակի խորտակումից հետո 68 մարդ զոհվել է, իսկ ավելի քան 70-ը՝ անհետ կորել։ Սա Եմենի ափերի մոտ տեղի ունեցած նավաբեկությունների շարքի վերջին դեպքն է, որի հետևանքով զոհվել են հարյուրավոր աֆրիկացի միգրանտներ․ նրանք փախչում են աղքատությունից և հակամարտություններից՝ հույս ունենալով հասնել Պարսից ծոցի հարուստ արաբական երկրներ, գրում է Euronews-ը։
Եմենի հարավային Աբյան նահանգի մոտ՝ Ադենի ծոցում, խորտակվել է 154 եթովպացի միգրանտի տեղափոխող նավակը։ Աղետից փրկվել է միայն 12 միգրանտ, հայտնել է Միգրացիայի միջազգային կազմակերպության (ՄՄԿ) Եմենի գրասենյակի ղեկավար Աբդուսատտոր Եսոևը։
Նա հավելել է, որ Խանֆար շրջանում ափ են դուրս եկել 54 միգրանտի մարմիններ։ Եվս 14 մարդ մահացած է հայտնաբերվել և տեղափոխվել Եմենի հարավային ափին գտնվող նահանգի մայրաքաղաք Զինջիբարի հիվանդանոցի դիահերձարան։
Աբյանի անվտանգության վարչությունը հայտարարել է, որ մեծ թվով անհետ կորածների պատճառով իրականացվում է որոնողական-փրկարարական լայնածավալ գործողություն: Ափամերձ տարածքում արդեն դիակներ են հայտնաբերվել:
Եմենը շարունակում է մնալ Արևելքից և Աֆրիկայի եղջյուրից միգրանտների համար հիմնական երթուղի, որոնք փորձում են հասնել Ծոցի համագործակցության խորհրդի (ԾՀԽ) երկրներ՝ աշխատանք փնտրելու համար։
Մաքսանենգները հաճախ միգրանտներին տեղափոխում են վտանգավոր և գերբնակեցված նավակներով՝ Կարմիր ծովով կամ Ադենի ծոցով։ Վերջին ամիսներին ՄԱԿ-ը հաստատել է, որ այս վտանգավոր ճանապարհորդությունների ընթացքում հարյուրավոր աֆրիկացի միգրանտներ են մահացել։
2024 թվականին Եմեն է ժամանել ավելի քան 60,000 աֆրիկացի միգրանտ, ինչը մոտ 38%-ով պակաս է 2023 թվականի ավելի քան 97,000 թվից: ՄՄԿ-ը նշում է, որ անկումը պայմանավորված է Եմենի և տարածաշրջանային իշխանությունների կողմից ջրային տարածքներում պարեկության խստացմամբ:
Թարգմանությունը՝ Էմմա Չոբանյանի
