17.02.2026 | 11:12
Հայ Ազգային Կոնգրեսն իր անվերապահ աջակցությունն է հայտնում Հայ Առաքելական եկեղեցուն․ հայտարարություն
Թրամփը բարձր մաքսատուրքեր է սահմանել մի քանի տասնյակ երկրների համար․ դրանք ուժի մեջ կմտնեն օգոստոսի 7-ից
Քաղաքականություն
01.08.2025 | 11:17
ԱՄՆ նախագահ Դոնալդ Թրամփը գործադիր հրաման է ստորագրել, որով 69 երկրների և տարածքների, ինչպես նաև Եվրամիության համար 10%-ից մինչև 41% ներմուծման մաքսատուրքեր են սահմանվում, հաղորդում է BBC-ի ռուսական ծառայությունը։
Սա տեղի է ունեցել օգոստոսի 1-ից մի քանի ժամ առաջ, որը Թրամփը վերջնաժամկետ էր սահմանել՝ Միացյալ Նահանգների հետ նոր առևտրային համաձայնագրեր կնքելու համար։
Մաքսատուրքերը, որոնք հրամանում անվանում են «հստակեցված պատասխան», ուժի մեջ կմտնեն յոթ օր անց, և միայն Կանադայի դեպքում՝ անմիջապես։ Ընդ որում, Թրամփը Կանադայի համար մաքսատուրքերը 25%-ից հասցրել է 35%-ի։ Սակայն այս մաքսատուրքերը չեն տարածվում ԱՄՆ-Մեքսիկա-Կանադա առևտրային համաձայնագրում (USMCA) ընդգրկված ապրանքների վրա։ Դրանք հիմնականում ամբողջությամբ Հյուսիսային Ամերիկայի հումքից պատրաստված կամ ներմուծված հումքից բարձր վերամշակված ապրանքներ են։
Ամենաբարձր մաքսատուրքերը սահմանվել են Սիրիայի համար՝ 41%, ինչպես նաև Լաոսի և Բիրմայի՝ 40%։ Ամենացածր՝ 10% մաքսատուրքեր են սահմանվել Մեծ Բրիտանիայի և նրա Ֆոլքլենդյան կղզիների համար։
Սպիտակ տան կողմից հրապարակված ցուցակի «Բրազիլիա» բաժնում նույնպես 10% է նշված, չնայած նախորդող օրը Թրամփը հրամանագիր էր ստորագրել այս երկրից ներմուծման համար 50% մաքսատուրքի վերաբերյալ։
Ցանկում ներառված երկրների մեծ մասից, ինչպես նաև Եվրամիությունից ներմուծվող ապրանքները կենթարկվեն 15% մաքսատուրքի։
Եվրոպայում ամենաբարձր մաքսատուրքերը սահմանվել են Շվեյցարիայի (39%) և Սերբիայի (35%) համար։
Չինաստանը ցանկում չէ. Միացյալ Նահանգներն առանձին բանակցություններ է վարում իր հիմնական առևտրային գործընկերոջ հետ։
