07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
«Վրացական երազանքը» Կախա Կալաձեին երրորդ անգամ առաջադրել է Թբիլիսիի քաղաքապետի թեկնածու
Քաղաքականություն
01.08.2025 | 10:44
Վրաստանի իշխող «Վրացական երազանք» կուսակցությունը կրկին Թբիլիսիի քաղաքապետի թեկնածու է առաջադրել Կախա Կալաձեին, հաղորդում է Վրաստանի Առաջին ալիքը։
Կալաձեի թեկնածությունը կուսակցության թիմին ներկայացրել է Վրաստանի վարչապետ Իրակլի Կոբախիձեն, կազմակերպված միջոցառմանը մասնակցել է նաև «Վրացական երազանքի» պատվավոր նախագահ Բիձինա Իվանիշվիլին։
«Այսօր մենք կարող էինք Թբիլիսիի քաղաքապետի թեկնածու ներկայացնել պարզապես լավ քաղաքական գործչի, պարզապես լավ ղեկավարի կամ պարզապես լավ հայրենասերի, բայց ձեզ ենք ներկայացնում իսկական չեմպիոնի։ Չեմպիոն՝ այս բառի ուղիղ և փոխաբերական իմաստով։ Մեր թեկնածուն այն մարդն է, ով Վրաստանին նվիրել է բարձր մակարդակի հաղթանակներ։ Մեր թեկնածուն քաղաքականության, կառավարման և հայրենասիրության չեմպիոն է։ Նա չեմպիոն է ընտանիքում, չեմպիոն ընկեր և չեմպիոն մարտական ուղեկից»,- հայտարարել է Կոբախիձեն։
Կախա Կալաձեն երրորդ ժամկետով է առաջադրվել Թբիլիսիի քաղաքապետի պաշտոնում։ Առաջին անգամ նա ընտրվել է 2017 թվականին, երկրորդ անգամ՝ 2021-ին։
Վրաստանում տեղական ինքնակառավարման ընտրությունները նախանշված են հոկտեմբերի 4-ին։
