24.06.2026 | 15:19
Ֆրանսիայում Էբոլայով վարակման առաջին դեպքն է հաստատվել
Թուրքիան և Ղազախստանը 20 համաձայնագիր են ստորագրել՝ ուղղված ռազմավարական կապերի ամրապնդմանը
Քաղաքականություն
30.07.2025 | 20:49
Թուրքիայի նախագահ Ռեջեփ Թայիփ Էրդողանը և Ղազախստանի նախագահ Կասիմ-Ժոմարտ Տոկաևն Անկարայում համագործակցության 20 համաձայնագիր են ստորագրել՝ Ղազախստանի ղեկավարի բարձր մակարդակի բանակցությունների արդյունքներով պաշտոնական այցի շրջանակրում, գրում է Turkiye today-ը։
Համաձայնագրերը, որոնք ընդգրկում են էներգետիկայից և տրանսպորտից մինչև արհեստական բանականություն և լրատվամիջոցներ, ստորագրվել են Թուրքիա-Ղազախստան բարձր մակարդակի ռազմավարական համագործակցության խորհրդի 5-րդ նիստի շրջանակում։ Երկու առաջնորդներն էլ ստորագրել են խորհրդի համատեղ հայտարարությունը և վերջնական որոշումը։
Առավել նշանակալի համաձայնագրերի շարքում են Turkish Petroleum և NC Kazmunaygaz ընկերության միջև էներգետիկ համագործակցության վերաբերյալ համաձայնագիրը, ինչպես նաև Միջին միջանցքի երկաթուղային երթուղու բեռնափոխադրման համաձայնագիրը, որը ներառում է Թուրքիայի ազգային երկաթուղային օպերատոր «Pacific Eurasia Logistics»-ը և Ղազախստանի պետական երկաթուղիները։
Տոկաևն ընդգծել է Չինաստանն ու Եվրոպան Կենտրոնական Ասիայի և Թուրքիայի միջոցով կապող Տրանսկասպյան միջազգային տրանսպորտային երթուղու՝ Միջին միջանցքի ռազմավարական արժեքը։ Նա ընդգծել է Ղազախստանի պատրաստակամությունը՝ ընդլայնել ենթակառուցվածքային համագործակցությունը և աջակցել թուրքական ներդրումներին, քանի որ ղազախական ներդրումները Թուրքիայում արդեն գերազանցում են 2,5 միլիարդ դոլարը։
Ղազախստանի նախագահը նաև շնորհավորել է Էրդողանին հուլիսի սկզբին Ստամբուլում կայացած IDEF 2025-ի՝ 17-րդ միջազգային պաշտպանական արդյունաբերության ցուցահանդեսի հաջող կազմակերպման կապակցությամբ: Նա բարձր է գնահատել Թուրքիայի պաշտպանական կարողությունները և ընդգծել տեղեկատվական տեխնոլոգիաների և արհեստական բանականության ոլորտներում համատեղ աշխատանքի հեռանկարները ու նշել․ «Մենք հատուկ նշանակություն ենք տվել տեղեկատվական տեխնոլոգիաների համատեղ զարգացմանը»:
Տոկաևը կարևորել է նաև Թուրքիայի միջնորդական դերը Ռուսաստան-Ուկրաինա բանակցություններում։ Նա վերահաստատել է Ղազախստանի աջակցությունը երկու երկրների տարածքային ամբողջականությանը և կոչ արել դիվանագիտական լուծումներ գտնել համաշխարհային հակամարտությունների համար։
Թարգմանությունը՝ Էմմա Չոբանյանի
