22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
Պեկինում ջրհեղեղի հետևանքով 30 մարդ է զոհվել, տարհանվել է 80,000 մարդ․ ՏԵՍԱՆՅՈՒԹ
Քաղաքականություն
29.07.2025 | 13:12
Չինաստանի մայրաքաղաք Պեկինում տեղացած հորդ անձրևին հաջորդած հեղեղման հետևանքով զոհվել է 30 մարդ, իշխանությունները տարհանել են 80,000 մարդու։ Այս մասին հայտնել են պետական լրատվամիջոցները, գրում է France 24-ը։
Այս շաբաթ տեղատարափ անձրևներ են տեղացել Չինաստանի հյուսիսում, այդ թվում՝ մայրաքաղաքում և Հեբեյ, Ցզիլին և Շանդուն նահանգներում։ Զոհերի ամենամեծ թիվը գրանցվել է Միյունում՝ քաղաքի հյուսիսարևելյան արվարձանային շրջանում։
Պետական լրատվամիջոցները հայտնում են, որ խիստ տուժել են նաև քաղաքի հյուսիսում գտնվող Հուաիրոու շրջանը և հարավ-արևմուտքում գտնվող Ֆանգշանը։
Տասնյակ ճանապարհներ փակվել են, ավելի քան 130 գյուղ զրկվել է էլեկտրաէներգիայից։ Հրշեջները փրկել են տարեցների խնամքի կենտրոնում արգելափակված 48 մարդու, հաղորդում է CCTV-ն։
Չինաստանի նախագահ Սի Ցզինպինը երկուշաբթի երեկոյան կոչ է արել գործադիր իշխանության ներկայացուցիչներին պատրաստվել ամենավատ սցենարին և արագացնել ջրհեղեղի տարածքներից բնակիչների տարհանումը։ Կառավարությունը 350 միլիոն յուան (49 միլիոն դոլար) է հատկացրել հեղեղից տուժած ինը շրջաններում աղետի հետևանքների վերացման համար, երեքշաբթի օրը հաղորդել է պետական CCTV հեռուստաալիքը։ Մայրաքաղաքի համար առանձին 200 միլիոն յուան է հատկացվել։
Չենդե քաղաքի մոտակայքում գտնվող գյուղում սողանքի հետևանքով 4 մարդ է զոհվել, 8-ը դեռևս անհետ կորած է համարվում։
Չինաստանը ջերմոցային գազերի՝ աշխարհում ամենամեծ արտանետողն է, որոնք, գիտնականների կարծիքով, նպաստում են կլիմայի փոփոխությանը և ծայրահեղ եղանակային երևույթներն ավելի հաճախակի ու ինտենսիվ են դարձնում։ Չինաստանի իշխանությունը խնդիր է դրել երկիրը դարձնել վերականգնվող էներգիայի կենտրոն և մինչև 2060 թվականն իր ահռելի տնտեսությունը դարձնել ածխածնի արտանետումներից զերծ։
Թարգմանությունը՝ Էմմա Չոբանյանի
