Թաիլանդի և Կամբոջայի առաջնորդները համաձայնել են «անհապաղ և անվերապահ հրադադարի»

Մալայզիայում հանդիպել են Թաիլանդի և Կամբոջայի վարչապետները՝ Հարավարևելյան Ասիայի երկու երկրների միջև մի քանի օր տևած մահացու սահմանային բախումներից հետո հնարավոր հրադադարի քննարկման համար։ Այս մասին հայտնում են տեղական լրատվամիջոցները, գրում է գերմանական DPA գործակալությունը:

Սոցիալական ցանցերում տարածվել են տեսանյութեր, որոնցում երևում է, թե ինչպես են Կամբոջայի վարչապետ Հուն Մանեթը և Թաիլանդի ժամանակավոր վարչապետ Փումտհամ Վեչայաչայը երկուշաբթի կեսօրին ժամանում Մալայզիայի Պուտրաջայա քաղաք, որը երկրի վարչական կենտրոնն է։

Երկու երկրների միջև սահմանային վեճը սրվել է անցյալ հինգշաբթի, երկու կողմերն էլ այդ ժամանակվանից ի վեր հայտնել են ծանր մարտերի ընթացքում զոհերի և վիրավորների մասին։ Տասնյակ հազարավոր մարդիկ տեղահանվել են բռնության պատճառով։ Բանգկոկի և Պնոմպենի վրա միջազգային ճնշումը մարտերը դադարեցնելու համար մեծանում է, իսկ ԱՄՆ նախագահ Դոնալդ Թրամփը հեռախոսազրույցներ է ունեցել երկու վարչապետների հետ՝ հակամարտության դադարեցման ջանքերի շրջանակում։

Այսօրվա բանակցություններին նախատեսվում էր նաև Միացյալ Նահանգների, Չինաստանի և Մալայզիայի ներկայացուցիչների մասնակցությունը։

BBC-ի հաղորդմամբ՝ Մալայզիայի առաջնորդ Անվար Իբրահիմը մամուլի ասուլիսի ժամանակ հայտարարել է, որ Կամբոջայի վարչապետ Հուն Մանեթը և Թաիլանդի ժամանակավոր ղեկավար Փումտհամ Վեչայաչայը «արտահայտել են իրենց դիրքորոշումը և անհապաղ հրադադարի պատրաստակամությունը»։ Անվարը նշել է, որ Թաիլանդը և Կամբոջան կունենան  «անհապաղ և անվերապահ հրադադար», որն ուժի մեջ կմտնի տեղական ժամանակով կեսգիշերից։

«Սա կարևոր առաջին քայլ է դեպի լարվածության թուլացում և խաղաղության ու անվտանգության վերականգնում»,- ասել է նա։

Կամբոջայի վարչապետ Հուն Մանեթը բանակցություններն անվանել է «շատ լավ հանդիպում» և ասել, որ հույս ունի «անմիջապես դադարեցնել մարտական գործողությունները»։ Նա նշել է, հակամարտության երկու կողմերում էլ 300,000 մարդ տեղահանվել է։

Կամբոջայի առաջնորդը շնորհակալություն է հայտնել Անվարին, ԱՄՆ նախագահ Դոնալդ Թրամփին և Չինաստանի կառավարությանը միջնորդությանը մասնակցելու համար, ինչպես նաև իր թաիլանդցի գործընկեր Փումտհամ Վեչայաչային՝ բանակցություններին «կառուցողական» ներգրավվածության համար։