Բելառուսից ԱԹՍ-ն թռել է Լիտվայի տարածք․ այն նկատվել է Վիլնյուսի մոտակայքում․ ՏԵՍԱՆՅՈՒԹ

Լիտվան հայտնել է, որ հուլիսի 28-ի առավոտյան տեղի բնակիչները նկատել են անհայտ անօդաչու թռչող սարք, որը հատել է  երկրի օդային տարածքը Բելառուսից։

«Այսօր առավոտյան բնակիչներից հաղորդումներ են ստացվել անօդաչու թռչող սարքի մասին, որը, ամենայն հավանականությամբ, Բելառուսից  է թռել  Լիտվայի տարածք։ Ըստ հաղորդագրությունների՝ անօդաչու թռչող սարքը նկատվել է մոտ 200 մետր բարձրության վրա, վերջին անգամ այն տեսել են Վիլնյուսի մոտակայքում»,- ասել է Ազգային ճգնաժամային կառավարման կենտրոնի ներկայացուցիչ Դարյուս Բուտան, գրում է BBC-ի ռուսական ծառայությունը։

LRT ռադիոյին տված հարցազրույցում նա ասել է, որ «ներկայում չկա հավաստի տեղեկատվություն այս օբյեկտի կողմից եկող սպառնալիքի մասին»։

«Մենք փորձում ենք պարզել, թե որտեղ է գտնվում անօդաչու թռչող սարքը, որտեղ կարող էր ընկնել»,- հավելել է Բուտան։

Պաշտպանության նախարար Դովիլե Շակալիենեն էլ LRT-ին ասել է. «Այսօր եղանակը բարենպաստ է օդապարիկների համար, որոնք մաքսանենգներն օգտագործում են իրենց բեռը տեղափոխելու համար: Մենք դեռ չենք կարող ճշգրիտ որոշել, թե ինչ առարկա կամ առարկաներ են դրանք»:

Ականատեսները սոցիալական ցանցերում գրել են, որ նկատել են անօդաչու թռչող սարքը առավոտյան ժամը 5-ից կարճ ժամանակ առաջ:

Հուլիսի 10-ին Լիտվայի իշխանությունները հայտարարել էին, որ Ռուսաստանի կողմից Ուկրաինայի դեմ պատերազմում օգտագործվող «Շահեդ» անօդաչու թռչող սարքը մտել էր երկրի օդային տարածք։ Ավելի ուշ պարզվել էր, որ Լիտվայի սահմանը հատել էր «Գերբերա» դրոն իմիտատորը, որը որևէ սպառնալիք չէր ներկայացնում։

«Գերբերա»-ն Լիտվայի տարածքում մնացել էր մոտ երեք րոպե՝ նախքան Շումսկասի փակ սահմանային անցակետի մոտ ընկնելը։