06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
ԵՄ-ն դադարեցրել է օգնությունը Ուկրաինային Զելենսկու՝ հակակոռուպցիոն մարմինների անկախությունը վերացնող օրենքը ընդունելուց հետո․ NYT
Քաղաքականություն
27.07.2025 | 16:36
Եվրամիությունը հուլիսի 25-ին հայտարարել է, որ կկասեցնի Ուկրաինային տրամադրվելիք 1.5 միլիարդ եվրոյի օգնությունը՝ նախատեսված ընդհանուր 4.5 միլիարդ եվրոյից։ Այդ որոշումը կայացվել է Վլադիմիր Զելենսկու կողմից ստորագրված օրենքի հիման վրա, որով Ազգային հակակոռուպցիոն բյուրոն (НАБУ) և Հատուկ հակակոռուպցիոն դատախազությունը (САП) փաստացի ենթարկվում են գլխավոր դատախազի գրասենյակին, գրում է The New York Times-ը։
NYT-ը հիշեցնում է, որ Ուկրաինային աջակցելու այս հիմնադրամը ստեղծվել է Եվրամիության կողմից 2024 թվականին։ Երեք տարվա ընթացքում նախատեսվում է այդ հիմնադրամից հատկացնել 50 միլիարդ եվրո՝ պատերազմից պատճառված վնասները վերացնելու և երկիրը ԵՄ-ին անդամակցելու համար պատրաստելու նպատակով։ Այս գումարները չեն կարող օգտագործվել ռազմական գնումների համար և պայմանավորված են Կիևի՝ կառավարման ստանդարտներին հասնելու առաջընթացով։
Եվրահանձնաժողովի ներկայացուցիչ Գիյոմ Մերսիեն լրագրողներին հայտնել է, որ Ուկրաինան հունիսին դիմել է այդ միջոցները ստանալու համար, չնայած նրան, որ 16 չափանիշներից 3-ը չեն կատարվել՝ ներառյալ՝ մասնագիտացված հակակոռուպցիոն դատարանի դատավորների նշանակման ձախողումը։
NYT-ը նշում է, որ օգնության կասեցումը դառնում է ազդակ, որ Եվրամիությունը պատրաստ է քննադատել Զելենսկու կառավարության ներքին քաղաքականությունը՝ նույնիսկ պատերազմի ժամանակ։ Թերթի փոխանցմամբ՝ սա նաև հարցեր է առաջացրել՝ արդյոք Արևմուտքում սկսում է նվազել վստահությունը Զելենսկու հանդեպ։
Սակայն 1.5 միլիարդ եվրոյի պահումը դեռ վերջնական որոշում չէ՝ ֆինանսավորումը կարող է վերականգնվել, եթե Ուկրաինան կատարի համապատասխան չափանիշները, նշում է NYT-ը։
Հիշեցնենք՝ հուլիսի 22-ին Ուկրաինայի Գերագույն ռադան ընդունեց, իսկ Զելենսկին անմիջապես ստորագրեց օրենք, որը փաստացի հակակոռուպցիոն մարմինները հանձնում է գլխավոր դատախազի վերահսկողության ներքո՝ զրկելով նրանց անկախությունից։ Դրանից հետո բողոքի ակցիաներ սկսվեցին Կիևում, Օդեսայում, Լվովում, Դնեպրում, Խարկովում և այլ քաղաքներում։
Զելենսկին հայտարարել է, որ լսել է բողոքող քաղաքացիների կարծիքը՝ և հուլիսի 24-ին ներկայացրել է նոր օրինագիծ, որը պետք է վերականգնի հակակոռուպցիոն մարմինների անկախությունը։ Նրա խոսքով՝ նոր նախագծում նախատեսվում են մեխանիզմներ, որոնք կպաշտպանեն այդ մարմինները ռուսական ազդեցությունից։ Financial Times-ը, հղում անելով իր աղբյուրներին, հաղորդում է, որ իշխող խմբակցության մոտ 70 պատգամավորներ վախենում են կողմ քվեարկել այս օրինագծին՝ մտավախություն ունենալով, թե իրենց դեմ կարող են սկսվել անհիմն քրեական հետապնդումներ՝ վրեժխնդրության շարժառիթով։
