Շոգ ու ծարավ. Բաքուն տառապում է ջրի պակասից ամառային տապի պայմաններում

Բաքվի տարբեր շրջաններում ջրամատակարարման հետ կապված լուրջ խնդիրներ են առաջացել։ Ադրբեջանական լրատվամիջոցները հաղորդում են, որ Սուրախանի շրջանի Ենի Գյունեշլի բնակավայրում խմելու ջուրը մատակարարվում է միայն չորս օրը մեկ անգամ, իսկ Յասամալ շրջանի MIDA բնակելի համալիրում բնակիչներն ընդհանրապես ջուր չունեն։ Ջրամատակարարման հետ կապված խնդիրներ կան նաև Խիրդալանում, Լոքբաթանում և Զիխեում։

Տեղեկությունների համաձայն՝ քաղաքի այլ շրջաններում նույնպես ջրի ճնշման նվազում է նկատվում, ջրանջատումներ են գրանցվում։ Լրագրող Այթան Մամեդովան ֆեյսբուքյան իր էջում գրել է, որ այն օրերին, երբ Բաքվում ջերմաստիճանը հասնում է 40-42 աստիճանի, քաղաքի տարբեր մասերում մի քանի օր է՝ ջուր չկա։

«Ինչո՞վ է զբաղվում  բնակչության ջրամատակարարման համար պատասխանատու պետական մարմինը։ Նրանք վերանվանել են «Ազերսու», ի՞նչ։ Որակը դարձել է ավելի վատ, քան նախկինում։ Իշխանության մեջ գտնվողները բոլորն ապրում են շքեղ բնակարաններում, նրանք ամեն ինչ ունեն, և ուրիշների վրա թքած ունեն։ Մարդը պետք է ունենա խիղճ, ամոթի զգացում, բայց նրանք չունեն»,- գրել է նա։

Միացյալ ջրամատակարարման ծառայությունը հայտնել է, որ Բաքվում և հարակից տարածքներում ջրամատակարարման ընդհատումները տարբեր պատճառներ ունեն։

«Ամռանը ջերմաստիճանի կտրուկ բարձրացման պատճառով ջրի պահանջարկի աճը բնական երևույթ է: Այս առումով, գոյություն ունեցող ջրընդունիչ կառույցների և գլխավոր խողովակաշարերի գերբեռնվածությունը կանխելու, ինչպես նաև վթարների ռիսկը նվազագույնի հասցնելու համար իրականացվում է ջրամատակարարման որոշակի կարգավորում»,- ասվում է հայտարարության մեջ։

Ադրբեջանի ՊՆ-ն իր հերթին հայտարարություն է տարածել, որ վերջին շրջանում գրանցված աննորմալ շոգի պատճառով  միավորումներում, կազմավորումներում և զորամասերում, ինչպես նաև հատուկ ուսումնական հաստատություններում ձեռնարկվել են մի շարք միջոցառումներ՝ ադրբեջանական բանակի զինծառայողների շրջանում շոգի և արևահարության դեպքերը կանխելու համար։

Թարգմանությունը՝ Էմմա Չոբանյանի